Muqtada Al Sadr, dux ille rebellionis si’itarum in Iraquia media et meridionali ardentis, die Mercurii praeterito inopinate arma deponere urbemque sanctam Nadsaf relinquere assensus est. Hoc fecit paucis horis postquam regimen Iraquiensium pronuntiavit suos, Americanis a tergo relictis, mox meschitam Ali ipsam, ubi Al Sadr manere creditur, petituros. Usque tamen ad diem Saturni de tempore et modo reditus Al Sadr negotiabatur, pugnaeque nullo modo cesserunt.

Irania ictum perficere potest in hos qui apparatui suo nucleari immineant – declaravit Ali Samkhani, administer publicus defensionis Iraniae. Quod sine dubio responsum est novissimis nuntiis stationis televisificae panarabicae Al Dsasira de Americanis Israhelianisque ictum praeventionis contra electrificinam nuclearem Busser molientibus. Rerum nuclearium periti amborum supradictorum nationum timent ne in electrificina Busser Irania tela nuclearia faciat. Ultimo die Veneris regimen USA nuntium a speculatoribus suis allatum divulgavit secundum quem tres post proximos annos Irania tela nuclearia possidere poterit.

Quattuor iam per dies urbs capitalis Nepaliae, Kathmandu, in obsidione est a rebellatoribus cogitationibus ducis pristini Sinarum Mao Zedong incitatis parata. Hi, suos e carceribus liberandos de regimine poscentes, pyrobolos media in urbe in deversoria aedesque vigilium publicorum mittunt, minantque omnia autocineta urbem relinquere conantia ab suis telis petenda. Abhinc octo iam per annos pugnant maoistes ut domus regalis Nepaliae regimine communistarum substituatur. Circa 10 milia hominum hoc in bello vitam amiserunt.

Intermissione laboris et studiorum scholae permultae Lettoniae ab die 1 mensis Septembri minantur ob iussum regiminis quo in scholis ubi pueri non Lettonice loquentes doceantur saltem 60% horarum Lettonice habeantur. 42% in Lettonia habitantium non Lettones, sed Russi, Rutheni Albi, Poloni vel Ucraini sunt, quorum dimidia pars lingua Lettona loqui nescit.

Hic metam huius peregrinationis attigi – dixit papa Iohannes Paulus II Lapurdi (Lourdes), ante aditum in Antrum illud sanctum Massabitensem, quod nonnulli ut valedictum papae senis morboque Parkinson afflicti cum vita eius, figuratis verbis expressum, intellexerunt. Inter quos et pater cardinalis Belgarum Godefridus Danneels, qui nonnullis ut papa sequens fore videtur.

Regimen Israhelianorum milites, qui trauma ut dicitur postpugnali laborant, cannabibus Indicis mederi vult. Studiosus Israhelianus Raphaelis Meshulam monstravit enim rodentia animalia quaedam cannabibus assumptis omnium cruciatuum pristinorum quasi oblita esse – acta diurna Israheliana "Maariv" nuntiant. Eadem septimana "The Guardian" scribit de consiliis regiminis Britannorum militibus in Iraquia stipendia merentibus, si in pugnam vigiliamve diuturnam ituri sint, medicamentum psychotropicum cui nomen amphetamina praebere, cuius gratia homines longum per tempus sine molestia vigilare possint. Medicamenta amphetaminae similia iam longe – scripsit "The Guardian" - a militibus Americanis in Afghanistania manentibus scitu et consensu tribunorum eorum sumuntur.

Plus et plus senium rude donatorum terrarum Europae Septentrionalis domos suas venum dant, ut novas in ora quadam Maris Mediterranei (Interni) emere ibique ultimos annos vitae degere possint – ephemeris hebdomadalis Franccogallica "L’Express" nuntiat. Consilia talia senes Britanni et Theodisci praecipue, insuper Belgae, Scandi, Batavi necnon Helvetii capiunt, qui saepe ut vicini in coloniis quasi linguisticis suorum novo in loco manere malunt. Iam praeterito anno 48% omnium aedium in litore maritimo Hispaniae venum datarum ab extraneis emptae sunt; post annum 2007 plus quam dimidiam partem alienigenae empturi fore aestimantur.

Speluncam in qua Iohannes Baptista habitasset prope Hierosolymam se invenisse credit Simon Gibson, archaeologus Britannus. Spelunca haec iam ante quinque annos reperta est, nunc demum tamen Gibson inter imagines in pariete eius pictas hominem longis capiliis invenit, quem Iohannem ipsum esse vult. Imagines a monachis Byzanthinis pictae esse creduntur, qui hunc locum saeculis IV-VII post Christum natum curaverunt.

Scientia nostra hodierna de symposiis illis Graecorum oritur, quibus semper vinum adfuerit, cuius rei Plato testis – Christophorus Kowalski scripsit, qui hodoeporica vinorum mundi a Roberto M. Parker iuniore scripta (Parker’s Wine Buyers Guide) Polonice reddidit.

22 Augusti huius anni, seu septimo die Septimi secundum calendarium lunare Sinarum, festum Amoris, sicut in Occidente dies Sancti Valentini, incidit. Hoc enim solo in anno die aut hac potius nocte filia septima Imperatoris Caeli et pastorculus orbus vaccarum, amore capti et hanc ob rem a patre filiae in lumina caelestia mutati, hi e constellatione Altaris, illa Vegae, in conspectu propinquissimo sui paululum manere possunt. Quae propinquitas tamen 17 annis luminis per universum currentis metitur. Sed quid tale amori vero!

49 dollariis cum 29 centessimis venum ibat die Veneris dolium petrolei generis Light Crude in bursa Novi Eboraci, plus ergo quam quandocumque antea. A fine mensis Iunii pretium petrolei 12 iam dollariis per dolium auctum est. (PAP)

30% cauponarum Francogallorum potatores vini decipiunt, praesertim iis pro vino signo originis denotato vinum ut dicitur mensae (domus) praebentes. (Le Canard Echaîné)

150 milia Araborum in Autonomia Palaestina habitantium speculatoribus Israhelianis auxilia dant. (Los Angeles Times)

25 annos in vinculis manebis si cinaedus Zanzibarensis es. Si fautrix tamen amoris lesbiaci hac in insula habitans, septem tantum annorum poenam dabis. (Le Canard Echaîné)

126 miliarda dollariorum Americanorum solvet regimen USA hoc anno Iraquiae causa. (Gazeta Wyborcza - Metro)

330 miliones dollariorum Americanorum constabit reconstructio Novi Eboraci turrium societatis World Trade Center. (Gazeta Wyborcza - Metro)

Octo ex 16 administris publicis novi regiminis Hispaniae ministri primarii Iosephi Ludovici Roderici Zapatero mulieres sunt, inter has et vicaria ipsius Zapatero rhetorque regiminis Maria Theresia Fernandez de la Vega. (Vogue)

36 pyxides cerevisiae ebibit ursus qui campum tentoriis peregrinantium praebitum in civitate Americano Vasingthonia inopinate visitavit. Postea obdormuit. (PAP)

43% Americanorum putant tormenta cruciatusque a vigilibus publicis contra tromocratos iure adhiberi posse debere. (PAP)