Pax in urbe sacra si’itarum Iraquiae Nadsaf regnat postquam bellatores clerici iuvenis Muqtada al Sadr meschitam ubi Ali, gener ille Mahometi, sepultus est, reliquerunt, claves ad templum summamque in urbe potestatem in manus pontificis (aiatollah) Ali al Sistani tradiderunt. A mense Aprilis in Nadsaf, Kuta aliisque urbibus mediae meridionalisque Iraquiae rebellio copiarum Mahdi, ut bellatores al Sadr vocantur, ardebat contra regimen Iraquiense Americanosque directa. Vetus al Sistani praeterita septimana Londinio, ubi in nosocomio aegrotus manebat, in Iraquiam venit, iussitque quam plurimos si’itas secum urbem Nadsaf die Veneris petere, ut pacem indutiasque a sadristis obtinerent. Hi a pugnam desistere polliciti sunt, arma tamen ipsorum non deposuerunt.

"Clamor" pictura illa celeberrima Eduardi Munch (1863-1944) necnon eiusque "Madonna" furto a museo Osloensi surreptae sunt. Furtum in medio die Solis ultimo, multisque testibus, perpetratum est, cum duo fures personati manuballista vitam custodium visitantiumque minantes, a nullo homine impediti ambas picturas e museo extulerunt.

Ad Kalendas Septembres tempus regimini Sudaniensi a Nationibus Unitis (ONU) datum est ut cohortes Gangavidarum, id est factionis Araborum quae in regione Darfur gentes Nigrorum aliis, non islamicae scilicet, fidibus deditas, maxime persequitur, armis exueret. Quod si non faciat, Sudaniae sanctiones oeconomicae imponentur. Rebellio Nigrorum mense Februarii 2003 orta est, ut pecunia mercatu petrolei in Darfur extracti parata, maiore ex parte in provinciam ipsam redderetur. Usque ad 8 Aprilis praeteriti, cum indutiae vi ONU pronuntiatae sunt, a militibus regiminis Sudanensium Gangavidis auxilia dabantur. Inter 30 et 50 milia hominum hoc in bello vitam amiserunt, 1,4 milionis domum relinquere coacti sunt, plus quam 2 milionibus fames minatur.

Duae aeronaves vectoria die Martis praeterito in Russiae parte Europaea meridionali eodem fere tempore verisimiliter ob pyrobolorum ictus fractae sunt, totis 89 earum viatoribus gubernatoribusque mortuis. In reliquiis aeronavis Tu-134 prope ad urbem Rostoviam inventis pulvis dirumpens cui nomen hexogenium inventus est. Inquisitores Russi Tsetsenos ictuum reos putant.

Bellatores Tsetseni ultimo die Saturni urbem capitalem Grozny ictu ceperant, per paucas horas sua in potestate tenebant, postea in montes fugam fecerunt. Circa 50 milites fautoresque partis cum regimine Russiae collaborantis a bellatoribus capti proditionisque accusati et occisi sunt. Animadvertendum est nullas pugnas directas inter Tsetsenos et copias ipsas Russorum hac occasione peractas esse.

Diluvies biblica 34 per annos durabat regionesque maritimas Maris Nigri (Pontus Euxinus) praesertim afflictabat – Marcus Siddall, studiosus Britannus, qui diluvium, quomodo fuisset, in computatro simulando monstravit. Iam anno 1989 duo geologi Americani sedimenta in litore Maris Nigri scrutantes invenerunt altitudinem huius maris, tunc vere lacus, ante octo milia annorum repente 100 circiter metris auxisse, effectu – ut putant – undarum Maris Meditteranei (Interni) per rimam quandam saxorum hodierni freti Bosporensis in Pontum largiter aquam infundantium. Quod hi ambo et nonnulli alii putant in memoria gentium tunc ibi habitantium ut diluvium ingens e caelo in terram missum servatum esse.

Turris inclinata Pisarum servata est! – nuntiant studiosi qui duce professore Michaeli Jamiolkowski ultimis in annis turrim "curaverunt". Curis eorum efficitur ut non solum declinare destituerit, sed etiam rursus 40 centimetris deflecta sit turris annis 1173-1350 structa, quae ante paucos annos per quattuor et dimidium metrum prona super urbem minabatur.

Horrore afficior cum cogitam haec terribilia omnia de quibus scribo re vera accidere posse – Carolus Fuentes, scriptor Mexicanus librorum generis cui Anglice nomen political fiction, a „Financial Times" citatus.

Dies 30 Augusti huius anni est festum dentis Buddhae variis in terris Asiae celebratum. In insula Ceylanum (Sri Lanka) prope ad urbem Kandy templum in summo monte stat, ubi dens Sapientis sub terra infodi creditur. Noctu plenilunii mensis Augusti turbae templum petunt – tunc dens vi lunae attractus propius ad terrae speciem esse putatur.

Meminisse tamen debemus dentem sapientiae primum saepe esse qui os relinquat.

Milliardum et 628 miliones hominum anno 2050 in India habitabunt, terra haec maxima numero habitantium in orbe terrarum erit – patet e prognosi societatis Population Reference Bureau cui sedes Vasingthoniae est. Prima hodie gens indicis – Sinae cum 1,3 miliardi hominum – proximis in decennis lentius quam adhuc procreet, eodem anno 2050 cum miliardo et 437 locum alterum in indice tenebit. Terra tertia sicut et hodie erunt Civitates Unitae Americae (tunc 420; hodie 294 miliones). Maxime tamen decrescent patriaeque senium fient civitates Europae, inter has autem praesertim Bulgaria (35% minus homines habebit quam hodie), Dacoromania (27%), Hungaria (25%), Ucraina (19%) et Russia (17%). (PAP)

35,9 milionis seu 12,5% omnium civium USA sub limine paupertatis vitam anno praeterito degerunt, id est 1,3 milionis plus quam anno 2002, licet oeconomia civitatis his duabus annis crevit – patet ex examinatione regiminis. (PAP)

Inter unum et tres miliarda dollarium Americanorum mercedis accipiet scriptor praeclarus Columbianus Gabriel Garcia Márquez a societate cinematographica Hollywoodiensi Stone Village Pictures quae librum scriptoris "Amor in tempore pestis" ut pellicula reddere vult. 76 annorum natus Márquez, semper fautor partis sinistrae amicusque bonus ducis Cubae Fidelis Castro, explicat se morbo cancri aegrotum debere amicae duobusque filiis suis hac pecunia dies futuros tutos praemunire. (El Espectador)

2390 horas in munere mansit anno praeterito medius Coreanus Meridionalis, Batavus tamen solum 1323 h – computat OECD Employment Outlook 2004. Coreanos sequuntur Poloni (1984 h), Mexicani (1908 h), Bohemi (1882 h) et Iapones (1828 h); in cauda indicis praeter Batavos latent Theodisci (1362 h) et Francogalli (1393 h). Maximo cum effectu tamen per horam laborant Luxemburgenses, cives USA, Hiberni, Francogalli et Britanni; minimo cum effectu Lettoni, Lithuani, Esti et Poloni. (Rzeczpospolita)

10% maior fructus annualis USA esset, nisi damna variorum generum psychotropicis et (praesertim) potionibus alcoholicis afflicta. (Gazeta Wyborcza)

15% omnium linguarum mundi sermones sunt gentium quae insulam Papuam Novam Guinema inhabitant. (Forum)

250 sacerdotes catholici Civitatum Unitarum Americae munere praeterito anno privati sunt ob accusationem paedophiliae. Quattuor episcopi Americani, qui harum rerum a sui subiectis sacerdotibus factis non ignari esse putantur, eodem anno abdicaverunt. (Forum)

Plus quam 170 milia civium Britanniae, ante omnia iuvenes nondum 20 annum agentes, unoquoque anno in nosocomia recipiuntur postquam in furore sibi vulnera cultris praesertim ingesserunt resve acutas sicut vitrum devorare conati sunt. (The Independent)

3% plus oeconomia Iaponiae augeret, si tantum principis uxor Masako puerum, imperatorem scilicet futurum Iaponiae, pareret. Tunc enim omnes Iapones maxime gaudere meliusque se gesturi putantur. Masako tamen adhuc puellulam solam anno 2002 exeunte peperit et a diurnariis continuo de novo partu, si scilicet et quando erit, rogata, in insaniam mox delabitura timetur. (Izvestia)