Saturni die vehementissime terra tremuit in Pakistania et in regionibus septemtrionalibus Indiae et Pakistaniae: terrae motus origo octoginta chiliometra ab urbe Islamabad distat, sed nutum animadverterunt incolae capitum Kabul et Novae Delhi.
Tria milia hominum interiisse narrantur: in schola quadam Pakistana funditus diruta quadringenti pueri et puellae vitam amisisse dicuntur. Item CCC perierunt in Indico Kashmir, CCL in Pakistano, sed legatus exercitus Pakistani de multis milibus victimarum cum diurnariis collocutus est.
Urbs Islamabad fortiter terrae motu percussa est: etiam nova aedificia insulae Margala Towers deleta sunt.
Ordo Nationum Unitarum iam adiutores misit, ut auxiliis toto ex mundo pervenientibus cives calamitate affecti quam celerrime uti possint: desiderantur cibaria, tabernacula, lintea et medicamenta. - HERIMANNUS NOVOCOMENSIS

MEXICANI TURBINE VEHEMENTI LABORANT

Non solum Civitates Americae Unitae (USA) turbinibus vehementibus affliguntur, nam quotannis denae procellae alias partes mundi excruciant, milia hominum interficientes et amplas regiones vastantes: de quibus caedibus paucas lineas vix invenire potes in actis diurnis ditiorum civitatum.
Praeterita septimana turbo, cui nomen Stan attributus est, labibus limosis et copiosis imbribus in America media et in Mexico meridionali minimum sescentos homines enecuit, quorum maior pars in Guatemala. Postquam enim per quattuor dies pluvia sine intermissione in vicos montanos et domos male exstructas decĭderat, plurimorum collium latera delapsa sunt; deinde, Mercurii die, in Mexico meridionali flumina ex aggeribus exundaverunt: in oppido Tapachula civitatis Chiapas pontes et duo millia aedificiorum eversa sunt. In Panabaj, remoto vico silvano Guatemalae, prope lacum Atitlan periegetis notum, centena cadavera caeno sepulta a succurrentibus effossa sunt.
Pleraeque victimae in miseris casis crassa charta ligno et ferro constructis, facillume luto collabentibus, vitam miserrime agebant ; ex Chiapas in civitatem Veram Crucem (Veracruz) ante turbinis adventum confugerunt omnes, qui de calamitate imminenti certiores facti abire potuerant: sed frustra, quandoquidem ibi etiam venti rapidissimi, qui singulo secundo XXXV metra percurrere poterant, tecta divellerunt, quattuor vulnerans omnesque ad renovatam fugam cogentes.
In portubus tamen petroleo transportando addictis labor, ut primum calamitas discesserat, iterum incohatum est; infelicibus incolis diutius est exspectandum. - HERIMANNUS NOVOCOMENSIS.

IN GERMANIA NUMERUM HIV-INFECTIONUM AUGERI DRAMATICÊ

Numerus HIV-infectionum in Germaniâ raptim exaucta est. Primo spatio anni 2005 dimidio 20% (vicenis partibus centesimis) plures homines infecti sunt vîro disimmunitidis quam primo anni proximi praeteriti spatio dimidio.
Berolino ex urbe – Scientistae Berolinensis Instituti Roberti Koch nuperrimê computaverunt a mense Ianuario usque ad mensem Iunium huius anni 1164 (mille centum sexaginta quattuor) homines in Germaniâ infectos esse vîro disimmunitidis. Itaque in hôc spatio temporis circiter 20% plures casûs infectionum registratos esse quam in spatio anni proximi praeteriti respondenti. Ulrich Marcus eiusdem instituti Berolinensis particeps dixit hunc numerum infectionum inde ex a.1993, quo computationes instituti incohatae essent, esse omnium maximum.
Institutum enuntiavit in ferê 60% (sexagenis partibus centesimis) omnium casuum infectos esse viros homosexuales. 17% (septendenas tantum centesimas) infectionum factas esse in coitibus heterosexualibus. In recentissimâ relatione Instituti Roberti Koch Berolinensis senae partes centesimae dicuntur esse consumptores drogarum, qui infecti sint siphunculis. Reliquos homines infectos, circiter 18% (duodevicenas partes centesimas) advenisse ex terris portionum disimmunitidis altarum.
Hôc tempore vĭros cum vĭris coeuntes subire periculum infectionis disimmuniticae maius quam in spatio 12 annorum transacto. Interea istud periculum altero ferê tanto maius esse quam anno 2001. Hoc concludi ex primis diagnosibus disimmunitidis, quae e laboratrinis in urbem Berolinum essent nuntiatae.
Reinhardus Kurth praesidens Instituti Roberti Koch Berolinensis dixit: "Sollicitamur de numero infectionum evitabilium tam vehementer exaucto". Investigatores autem putant hunc numerum praecipuê eo exauctum esse, quod viri homosexuales ipsis cum novis aut vix nôtis coeundi comparticipibus saepius saepiusque abstineant a condomiis adhibendis. Marcus vîrologus peritus opinatur vĭros homosexuales nimis multum confidere in probis disimmunitidis regulariter factis. "Tales probas" Marcus inquit, „qui subeunt nequaquam proteguntur ab infectione".
Ulla Schmidt ministra valetudinis foederalis (quae est socialistria) se novis numeris disimmunitidis dixit "graviter sollicitari". Oportere omnis sciret disimmunitidem adversus quosdam progressûs medicinales esse morbum insanabilem. Huius morbi viralis contagionem multiplicem efficacissime inhiberi animorum illuminatione et informatione.
Ex epidemiâ disimmunitidis annis octogenariis ingruente in Germaniâ circiter 24.000 hominum incidêrunt in disimmunitidem. Scientistae Instituti Roberti Koch computaverunt quotannis circiter 800 novos casus esse addendos. Circiter 80% (octogenas centesimas) casuum spectare ad viros. - LEO LATINUS

DE TURCIA ET CROATIA IN UNIONEM EUROPAEAM INITURIS

Diu agendum est, ut Turcia Unionis Europaeae sodalis fiat, nec certus est exitus. Denique mense Octobri ineunte longum iter coepit : praefectae tamen USAe exteris rebus addictae, Condoleezae Rice, cum rectoribus Turciae et Austriae telephonice ad hoc obtinendum colloquendum fuit.
Duae magnae difficultates initio pactionum obstiterant : cum Turci verebantur, ne cito Cyprus Hellenica, iam Unionis socia, foedus bellicum Occidentale NATO appellatum iniret, tum firme initui opponebantur rectores Austriae, cuius historia bellorum contra proximos Orientales abundat.
De Cypro praesides hodierni Unionis Europaeae, id est rectores Britanni, longis ambagibus omnium desideria explere potuerunt ; de oppositione autem Austriacorum, hoc obtinuerunt moderatores Vindobonenses, ut statim etiam cum re publica Croatarum colloquia initium caperent.
Laboriosis controversiis perfectis, post diem tertium mensis Octobris media nocte sollemnia habita sunt, ad initia pactionum cum Turcia et Croatia celebranda : sermonem habuit legatus praesidis Unionis Iacobus Straw, nulla ratione celans quam longum iter Turcis faciendum esset, quos negavit sine dubio in Unionem Europaeam ingressuros esse.
Initium pactionum cum moderatoribus Croatarum de improviso adnuntiatum est postquam Carola Del Ponte, dux indagatorum de facinoribus in civitatibus ex Jugoslavia dissoluta exortis perpetratis, eosdem, a quibus ante paucos dies se deceptam esse denuntiaverat, operam dedisse ad investigationes explendas adfirmavit. - HERIMANNUS NOVOCOMENSIS.

BUSH CUM DEO LIBERE COLLOQUENS?

A Deo ipso ducor! – ita Americanorum praesidentem Georgium (George) W. Bush coram moderatoribus Israhelianorum et Palaestinorum ante duos annos iurasse nuntiat, secundum acta diurna Britannica "The Guardian", Nabil Shaath, cui tunc apud regimen Palaestinense res exteras erant curandae. Deus dixit: I, Georgi, fac bellum contra tromocratas in Afghanistania latentes. Et ita feci. Deinde dixit Deus: I, Georgi, et finem tyranniae in Iraquia ponas. Et ita feci. At nunc denuo audire me sentio verba Dei loquentis: I, ut des Palaestinis civitatem eorum at Israhelianis tutelam – dixisse a Shaath fertur Unitarum Civitatum praesidens tempore negotiationum de pace in Israhel adipiscenda in vico maritimo Aegyptiorum Sharm el-Sheikh anno 2003 habitarum.
Domus Alba nuntium a "The Guardian" divulgatum verum esse negat, rerum Proximi Orientis periti admonent tamen eodem anno 2003, negotiationibus modo finitis, similia nuntiasse ephemeridem Israhelianorum maximi momenti "Haarec", cuius diurnariis tamen tunc non contigit aliquem huius rei testem nuntium suo nomine confirmare.
Percontatio Shaath, supradicta verba a Bush re vera pronuntiata esse asseverantis, hac mense inter tripartitum programma "Elusive Peace" (Pax eludens) a statione televisifica BBC emittenda sit. NANOMPOUPHOS

GASTROLOGOS HONESTATOS ESSE PRAEMIO MEDICINAE NOBELIANO

Ulcera stomachi per longum tempus credita sunt effici causis psychosomaticis. At duobus nunc Australianis gratiae sunt agendae, quod scimus causam horum ulcerum plerumque esse quoddam bacterium, cui nomen est Helicobacter pylori. Nunc Barry Marshall et Robin Warren, cum hoc bacterium eiusdemque effectum invenissent, honestati sunt praemio medicinae Nobeliano.
Holmiâ ex urbe – Eosdem Australianos honestatos esse hodie a commissione praemii Nobeliani Holmiensi enuntiatum est. Commissio declaravit Robinum Warren invenisse telâ stomachi mucosâ inflammatâ stomachum semper etiam infectum esse bacterio, cui nomen esset Heliobacter pylori.
Robin Warren et Barry Marshall telephonema commissionis Nobelianae acceperunt in aliquâ cauponâ urbis Australianae Perth. Göran Lindvall secretarius commissionis Holmiensis rettulit: "Eo tempore, quo cum Warreno et Marshallio locutus sum telephono mobili, iidem considebant in cauponâ mare aspectantes. Qui erant animis perquam inflammatis." Iidem Australiani annis praeteritis semper tempore medicinalis praemii Nobeliani annuntiandi convenerant in cauponâ, quia iam pridem computaverant se aliquando telephonema ex urbe Holmiensi accepturos esse.
Marshallium particulis telae hominum gastritide laborantium adhibitis prolem propagasse bacterii usque id tempus ignoti. Ambos scientistas denique invenisse bacterium Helicobacteris pylori inesse fere omnibus hominibus, qui laborant gastritide et ulceribus stomachi aut duodeni.
Cum usque in annos octogenarios saeculi proximi praeteriti nimia animi tensura (stress) et acidosis stomachi habitae sint pro causis praecipuis telae mucosae inflammatae et ulcerum stomachi et cancri stomachi, medici hodie pro certo habent tales morbos in plerisque casibus effici bacterio, cui nomen est Helicobacter pylori.
Praemium medicorum omnium summum hoc anno valet (nummis transnumeratis) 1,1 (unum-virgula-unum) milionem euronum. Hôc praemio medicinali enuntiato incohatur hornotina series praemiorum Nobelianorum.
Investigatores praemiis physices chemiaeque honestandi cras et die Mercurii enuntiabuntur. Enuntiatione more tradito omnium gravissimâ die Veneris indicabitur homo praemio pacis Nobeliano honestandus. Pro candidatis huius praemii accipiendi summae spei habentur magistratus energiae atomicae internationalis (IAEA) et Unio hominum bombâ atomicâ afflictorum Iaponica (Nihon Hidankyo). Nondum constat, quando donetur praemium litteraturae Nobelianum. Quod dicitur donatum iri aut die Iovis aut septimanâ proximâ futurâ. - LEO LATINUS

OPUS DEI CONTRA MISSAS NIMIS SOLEMNITER HABENDAS

Sententiam contra missas sacras grandiosas sub Iove parandas, quae missae tantopere cordi erant defuncto pontifici Iohanni Paulo II, expressit tempore synodii episcoporum his modo diebus in Vaticano habiti episcopus Xaverius (Javier) Echevarria Rodriguez, rector Operis Dei. Nocet enim interdum – ita Rodriguez – granditas tanta ipsae sacrae naturae missarum. Inofficialiter constat quoque novum papam tempore missarum grandium, sicut haec nuper prope Coloniam Agrippinam cum iuventute totius orbis peracta, non tam bene, quam antecessor eius, se sentire.
Opus Dei, nuper a scriptore Dan Brown in fabula ficticia "Notae Leonardii da Vinci" variis rebus malitiosis quasi incriminatum, societas est sacerdotum et (praesertim) laicorum "sanctitatem facinoribus vitae cotidianae petendam". Multi tamen credunt eam vero, at non pontificem Romanum, vi pecuniae coniunctionibusque clam ecclesiam catholicam regere. Iohannes (John) Allen diurnarius-chronista Vaticanensis stationis televisificae CNN, in libro suo novissimo "Opus Dei: secreta et potestas intus ecclesiae catholicae" (Opus Dei: Secrets And Power Inside The Catholic Church) Opus Dei nomine Octopi Dei nuncupat, qui polypus sit descriptione eius societas clandestina, cuius membra "super peras pecuniae plenas sedentes res varias moliuntur, ut sibi apti viri politici totius mundi suffragiis victores evadant". NANOMPOUPHOS

Suicidio mirum in modum perpetrato senex quidam Euodiopolitanus vehementissimê est consternatus: Qui modo cubitum cesserat, cum per lacunar magno cum strepitu irruit interfector sui ipsius.
Hongcongio (Euodiopoli) ex urbe – Idem vir taedio vitae correptus ex tabulato undecimo desiluerat mortiferê. Hodie astynomi rettulerunt eundem virum 43 annos natum cum ruderibus tegulisque appulsum esse ad habitaculum senis. Idem senex 63 annos natus televisurus erat uxorem exspectans. Vehementissimê consternatus est, sed corpus eius remansit integrum. Suicida autem refertur ex decennio laborasse morbo iecorali. - LEO LATINUS

PYTHONEM CROCODILO DEVORATO DISPLOSUM ESSE

Serpentium rostris saepe plura capi quam capi videntur generaliter notum est. At quidam python in viridario Everglades Floridano praedae suae magnitudinem haud rectê aestimavit: Corpus enim huius serpentis quamvis ingens non par erat praedae degluttitae.
Miami ex urbe Floridanâ – Serpens quattuor ferê metra longa crocodilum dimidiae longitudinis cum corripuisset conata erat eundem totum degluttire. Quidam investigator invênit pythonem displosum, in cuius ventre aspectabatur crocodilus. Cuius caput, umeri, pedes anteriores adhuc inerant corpori serpentis giganteae.
Mirificâ hac re inventâ homines oecologiae periti sollicitantur. Frank Mazotti Universitatis Floridanae biologus: "Si python" inquit, „potest necare crocodilum, certê etiam alias species potest necare." Qui biologus timet, ne species pythonis, quae e Burmâ in Floridam immigravit, bestias minores fuget, ut oecosystema periclitetur.
Idem autem scientista putat e pugnâ inter pythonem et crocodilum factâ etiam crocodilum evadere posse victorem. In casu supra commemorato crocodilum videri iam antea esse infirmatum, ut non iam pugnaret omnibus viribus. Verisimile esse bestiam degluttitam adhuc vixisse seque vehementer huc illuc movisse. Ideo serpentem esse displosam. - LEO LATINUS

DE PRAEMIO PACIS NOBELIANO NUPER ATTRIBUTO

Mohamed El Baradei, Aegyptio praesidi instituti Ordinis Nationum Unitarum (ONU) IAEA appellati, quod de vi atomica vigilat, Veneris die attributum est praemium Nobelianum pacis: nam omnibus viribus diffusionem armorum nuclearium obsititit. Hoc diurnarii iamdiu providerant, post LX annos a diruptionibus mortiferis in Iaponia perpetratis. - HERIMANNUS NOVOCOMENSIS

Plerisque in terris mundi hominibus minoribus 18 annis natu non licet, officialiter saltem, temeta bibere nicotianaque infumare, quibus interdictionibus nunc regimen Mexicanum prohibitum addidit notas cuti compungere, qui mos latius nomine Francogallico tatouage (quod e Polynesico tatau) notus est. Causa prohibitionis temeritas sit iuvenum, qua cum ducti, consilia capiunt, quorum effecta postea deplorent. - ST

Per decem saltem dies in nosocomio remanebit Alexander Ieframkau, plumbeator sive aquae ductorum sarciendorum peritus Mohyleviae urbe in Ruthenica vitam degens, quia vapulavit in caupona a homine cuiusdam, quod nimis similis facie sit praesidenti Belarussiae Alexandro Lukassenka. Ob hanc similitudinem a compotatoribus, quibuscum diem festum fabrorum aedes exstruentium celebravit, interdum bat’ka sive papa (quo nomine dictator terrae ipse a vulgo eum amante nominatur) nuncupatus est, quod audiens patriota quidam veteranusque belli, quod Unio Sovietica in Afghanistania gesserat, putans eos patrem patriae impudenter irridentes, "alterum Lukassenka" pugnis graviter pulsavit. Ipse a collegis Ieframkau statim apprehensus, vigilibus publicis traditus, in carcerem coniectus est. - ST

Folium arboris gingko biloba ut signum novum civitatis habere volunt 99% ex 1,7 milionis Serum de hac re a regimine indagatorum, quibus eligendum erat inter supradictam gingko (quam varios morbos sanare scire credunt Sinenses), pinum, cupressum, populum et salicem. Regimen communisticum Sinarum, quod adhuc vexillo utitur rubro cum quinque stellis (una, maxima, pro Seribus et quattuor parvulis pro principalibus nationibus minoribus terrae), effigiem alteram invenere conantur, qua Hongkongienses Formosanique facilius in rem communem allici possint. - ST

Omnia fere sua consecrare amant Poloni – die exempli gratia sancti Christophori autoraedas praeterito anno emptas sacerdotibus ad aqua sancta aspergendas praebent, die autem sancti Francisci (qui dies festus modo peractus est) item sub aspergile ponunt fratrum minorum (ut ipse sanctus animalia nuncupare solebat) domesticorum greges. Ad Varsovienses ergo, praesertim pueros puellasque, quorum multitudo una cum canibus, felibus, cricetis, psittacis, testudinibus necnon piscibus in pyxidibus vitreis portatis ad portam ecclesiae Sanctissimi Cordis Domini Iesus advenerat, sacerdos Arthurus Szajko, aspergile in manu tenens aquaeque spargendae paratus, his verbis orationem coepit: Benedice, Deus optime, iis animalibus, quae tua ex gratia manducaturi sumus... At tunc demum, mixturam precum horribilem se fecisse agnoscens, addidit: Ignoscite, fratres sororesque, volui dicere: quae comites nobis sunt in vita nostra cotidiana. - ST

Octavus quisque homo in Francogallia habitans legere scribereque aut omnino aut maxima ex parte nescit – patet ex investigatione a sede statistica Lutetiensi INSEE perfecta. Analphabeti ita sint 14% virorum et 8% mulierum Francogallorum, cum ab arte ratiocinandi alienati maneant 8% marum et 11% feminarum. Maxima pars scribere nescientium senes sunt. Indagatio decem milium hominum telephonice peracta est. - ST

Pulicum aut iis similium insectorum morsibus sistare coactus est tramen rapidum generis Eurocity numero 396 Nicaea Neapolim petens. Centenis enim his insectis in peregrinatores ictus afferentibus effectum est, ut omnes fere viatores in statione Genua-Principe currus relinquerent aliud sibi tramen a societate ferroviaria praeberi poscentes, quod impetrati iter perrexerunt. Biocolytae ad stationem advocati unum tantum currum insectis infestatum invenerunt, alii ergo viatores psichosi collectivae succubuisse creduntur. Incertum etiam est terra originis aggressorum, nam de primis ictibus queri peregrinatores coeperunt immo in limite inter Francogalliam et Italiam. - ST

Non licebit cinaedis munus sacerdotis catholici petere, etiam si inclinationi huic corporaliter numquam indulgent – legatur, secundum ephemerides Italianas "Corriere della Sera" necnon "Panorama", in decreto novissimo Benedicti XVI de rationibus sacerdotes futuros eligendi tractante. Munere sacerdotii fungi prohibeantur quoque candidati heterosexuales, quibus non contigit ultimis in tres annis, antequam seminarium intrarent, caelibatum recte observare. - ST

Currus invalidorum, qui motu mimico variarum partium faciei propulsari possit, a ingeniario quodam Theodisco inventus modo est. Cui vehiculo camera parva imposita est, quacum motus oculorum, palpebrarum orisque notantur et a computatro gubernatoriali currus ut iussa dextrorsum, sinistrorsum, recte, sista etc. interpretantur. Currus maxime idoneus fore speratur debilibus paralyticis. - ST

Color maxime ab Europaeis dilectus caeruleus est – docent studiosi Centri Colorum, in urbe Theodisca Weimar positi, 43 annorum experientia investigationis chromatum apud varios homines modorum recipiendi sententiam suam nitentes. Ex indagatione opinionum a Weimariensibus ultimis in annis peracta patet plus quam dimidiam partem Europaeorum caeli colorem aliis praeferre, secundum tamen hoc in ordine locum a rubro teneri. - ST

Officina stillaticia Industria Licorera de Bolivar urbis Columbianae Cartagena, postquam decocta pronuntiata esset, decrevit salaria fabris suis pristinis debita (coniunctim circa quattuor miliones dollariorum Americanorum) non pecunia, quia deest, sed rhomio sive vino Indico, omnia ad assem esse solvenda. Quod consilim maximo cum gaudio fabrorum receptum esse fertur. - ST

Contra legem gentium sive internationalem esse civibus Palaestinensibus a militibus Israhelianis ut "scuta viva" uti decrevit summum tribunale Israheliae, prohibens abhinc talis usus. "Scutis vivis" Israheliani primum usi sunt anno 2002 tempore incursionis militaris in oppida Ripae Occidentalis (fluminis Iordani). Unus saltem Palaestinus, 19 annorum Nidal Daraghmeh, hac occasione vitam amisit. - ST