Annus
2 0 0 5

NUNTII. Clementina Cantoni. NUNTII HEBDOMADIS (15 - 22.05.2005):

ITALICA MULIER IN AFGANORUM TERRA EREPTA

Lunae die Clementina Cantoni, mulier Italica quae in Afganistania pro viduis et pueris parentibus orbatis cum societate benefica "Care International" (Universa Sollicitido) operam dabat, a quattuor armatis abrepta est, dum per urbem Kabul autoraeda cum duobus sociis vehitur, qui feliciter effugerunt et libenter testimonium auctoritatibus dixerunt.
Hunc nuntium rettulit legatus Italicus Hector Sequi, omnes certiores faciens totam legationem diligenter omnia agere, quae libertatem mulieri reddere possint.
Societas Care International, in USA orta, operam in quingentis locis pro pauperibus praestat, adiuvantibus Ordine Nationum Unitarum, Unione Europaea et Argentaria Mundi, praesertim in terris miserrimis; solita est indigenas communi labori vocare. Postquam socia Anglo - Iraquica Margarita Hassan mense Octobri anni praeteriti erepta et efferate interfecta est, Care International Iraquiam dereliquit, ubi valetudini communi servandae, nosocomiis aedificandis et aquae ductibus exstruendis diu bene egerat.
Postridie nonnullae mulieres Afganae, velis ut mos est amictae, in fora descenderunt ut libertatem Clementinae, cuius operam et humanitatem nemo ignoraret, postularent; Saturni die per totam urbem expositae sunt magnae imagines ereptae feminae cum Afgano puerulo, quibus inscriptum erat "Adiuvate!".
Rectores Italiae omnia perseverant se facturos esse, ut bene meritae concivi libertas reddatur; item moderatores Afgani se diligentissime pro obsidis liberatione agere aiunt, quam denegant interfectam esse, quamvis nuntius funestus diffusum sit: ipse Timor Shah, unus e raptoribus, diurnario cuidam Clementinam bene valere seque cum medico mulierem visitasse confirmavit.
Die Veneris in omnibus Afganistaniae meschitis resonavit flagitatio liberationis; in amplissima meschita Kabul proclamavit orationum magister (mullah) "Deum finem omnium inhumanorum factorum poscere". - HP.


DE SUFFRAGIO MULIERUM IN KUWAIT

Senatus Kuwait deliberavit die XVII mensis Maii ius suffragii concedendum esse mulieribus, quibus integra civitas adhuc singulariter denegata erat.
In senatu, ubi nulla mulier sedebat, decem horas acriter de nova lege disceptatum est, tandem XXXV sententiam probaverunt, XXIII antiquaverunt: postquam exitus nuntiatus est, diu applauserunt mulieres quae aderant.
Longum et arduum iter legis fuit, cui maxima cum vi obstiterunt multi, qui mores maiorum ad verbum observandos censent: sed paulatim mutata est civitas et conscientia in Kuwait et feminae aequitatem et libertatem adhuc longinquam persequi coeperunt.
In Kuwait lex suprema aequalitatem virorum et mulierum agnovit, sed anno MCMLXII lex ita mutata est, ut feminis ius suffragii denegatum sit. Nihilo minus liberius ceteris civitatibus circa Sinum Persicum positis vivunt mulieres, quarum nonnullae apud legatorum aedes vel argentarias operam dant, magni momenti locos occupantes.
Ante aliquot menses sollemniter edicto fatwa appellato proclamavit Mohamed Soliman al Ashqar, theologus Islamicus, feminas suffragium ferre posse, sed senatorem fieri nequire; nuperrime centenae in foris capitis Kuwait "iustitiam libertatem aequalitatem" postularunt, caerulea vexilla ostendentes, legem Islamicam iura mulierum non obterere confirmantes.
"Mulieribus in iure adepto gratulor! - inquit rector supremus Sheikh Sabah Al Ahmad Al Sabah - quarum unam in moderatorum numero habere mihi in animo est."
Parum subridendum est Europaeis: nam in pago Helvetiorum Appenzell Interiore ante circiter XV annos suffragium mulieribus concessum est. - HP.


DE FILO ARANEARUM MAGIS QUAM CHALYBE RENITENTE

Scholaris Argentinus XVI annos natus hac demonstratione obtinuit quartum premium in Feria Internacionali Scientiarum in urbe Phoenice (E.U.) celebrata. Sebastián Noriella Parache, e provincia Argentina Tucuman, comprobavit filum, quod proferunt fragiles bestiolae validiorem chalybe esse atque utile ad contexendos thoraces contra glandes et protheseis, inter alias res, -sicuti docuuerunt heri acta diurna "La Gaceta de Tucumán". In opere, inter alia 1.400 opera electo a sapientibus qui obtinuerunt praemia Nobel, adulescens incuibuit araneis ‘nephilis clavipedibus’, quorum tela e filo aureo facta splendent sub sole. Noriella, qui agit secundum annum secundariae, constituit tenue aranearum filum habere renisum 1.241 megapascalium, quum renisus chalybis sit 900 megapascalium. "Quamvis filum araneae sit decies exilius capillo humano, si diametrum styli haberet, aeriplanum in medio volatu frenare posset. Una ex praecipuis eius virtutibus est id, quod tam validum quam lentum sive ductile sit". Alumnus obtinuit bursam 500 thalerum ad pergendum vestigare quae sit compositio fili quod genus aracnidum edit. Quamvis non veneficae, illae araneae bombice aureo, -ut vocantur ‘nephilae clavipedes’-, inferunt eruptiones si pili pedum tangunt vel leviter pellem humanam et inveniuntur in regionibus silvestribus velut in eis locis circa Famailla, quae urbs sita est 30 km ad meridiem a capite tucumano. 17 Maii 2005.- cfp


PETITIO AD PRAESIDENTEM PUTIN

Martis die (18 V) redactores commentarii septimanalis, cui titulus Wprost, legentes hortati sunt, ut ad praesidentem Russiae, Vladimirum Putin litteras mitterent, quibus ab illo peterent excusationem pro dictis atque omissis die festo victoriae de Germanis reportatae.
Ipsa redactio textum epistulae proposuit, ubi reprehenditur praesidentis Putin visio rerum gestarum Staliniana, eumque non condemnavisse pactum subscriptum a Ribbentrop et Molotov neque aggressionem Poloniae factam ab Unione Sovietica, sed etiam illum commonuisse quidem merita antifascistarum in Italia et Germania, sed silentio praeterivisse exercitus Polonicos, qui bello mundiali secundo inter maximos exercitus foederatos constituerunt quartam numero ac pondere vim militarem.
Cum autem a Lech Wałęsa, pristino praesidente Poloniae, quaesitum esset, quid putaret de hoc proposito, ille respondit se censere praesidentem Putin non esse vexan
dum eiusmodi litteris, quoniam illi multae iam essent sollicitudines de ipsa Russia et loqueretur motus amaritudine animi; melius esse totam rem silentio obvolvere et mentem viresque convertere ad aedificandas res Polonicas. Similiter Lech Kaczyński, Praeses factionis Ius et Iustitia putavit fore, ut Putin irasceretur litteris, quae prae se ferrent eius imaginem iocosam; quem tamen finem Polonis non esse persequendum, sed potius Polonicam rem politicam accommodandam reali statui rerum, quae circumdarent Civitatem. - Fr. BH. OFM.


DE CONTENTIONE REI PUBLICAE AEQUATORIANAE CUM COLUMBIANIS CIRCA VENENA IN AGRIS ASPERSA

"Nescitur" num gliphosatum illud, quod adversus pharmaca spargitur., habeat etiam effectus quosdam secundarios pernegatos ab auctoritatobus Columbianis. Cancellarius Aequatorianus, Antonius Parra Gil, dixit optionem nationis suae esse, ut aspersio detineatur in zona 10 kilometrorum intra fines agrorum Columbianorum descripta. "Haec mensura disputanda est, sed nobis videtur esse prudens, neque enim scitur num venenum istud noceat homini necne, quantumve noceat, si nocet. Unum quod vitare volumus est ne istud nos aliquo detrimento afficiat". Sed quum sint Civitates Foederatae, quae venenis ex aere in Columbia aspergendis maxime faveant, earum civitatum nuntia apud Quito, Kristie Kenney, dixit se nondum habuisse colloquium cum ministro Parra Gil, neque de ea re comentaria ferre posse; "ceterum quodcumque negotium grave Aequatorianos inter et Columbianos existat, id eisdem nationibus esse solvendum". Res publica Columbianorum monuit Aequatorianos de quadam sententia olim lata ab OEA, secundum quam gliphosatum arvis illicitis aspersum non noceat quidquam humanae saluti. Hoc extremum pernegatur a Francisco Santos, qui vice praesidente in Columbia est. Attamen Aequatoriani dubitant. Neque solum Aequatoriani, -sicut mihi constat. Nam in Europa quoque periti suspicati sunt atque praedicant eas aspersiones esse nocentissimas naturae. Et vere commemorandum est eam Fundationem "OEA" (Organizatio Civitatum Americanarum), quam Franciscus Santos in oratione citat, auspiciis auxiliisque imperii Septentrioamericani semper egisse. 18 Maii, 2005. cfp.



BREVES. Darth Vader BREVES:

"Ultio Sithorum" seu tertia et ultima pars pelliculae cinematographicae "Bella stellaria" a Georgio Lucas modo in lucem data, primo die cum in America Septentrionali monstraretur plus quam 50 milliones dollariorum emeruit. Quod adhuc nullae pelliculae contigit. Nonnulli credunt "Ultionem Sithorum", aculeis verborum histrionis, qui partem Darth Vader agit, praesidentem USA Georgium W. Bush castigare, ut monstrum scilicet tenebrarum eum monstrans.

Fere certum iam est Batavos constitutionem Unionis Europaeae plebiscitu improbaturos, nam 50,9% iam hominum indagatorum contra constitutionem suffragia se daturos declarant, cum 28,6% tantum pro constitutione adoptanda. Etiam in Francogalia adversarios constitutionis plus quam dimidiam partem suffragatorum esse patet.

Photographemata dictatoris pristini Iraquiae Saddam Husein subligari tantum induti in actis diurnis Britannorum "The Sun" publicata sunt. Causarum actores quibus Husein, internecionis plus quam 300 miliorum suorum accusatus, mox defendenus erit, editores "The Sun" in iudicium vocare volunt, nam – dicunt – photographemata dignitati dictatoris nocent.

Libertas! Libertas! – talibus exclamationibus participantium coepitur primus conventus partis adversae Cubanorum, cui moderator insulae communista Fidelis Castro, qui adhuc per 46 annos suos manu ferrea tenabat, perfeci sivit. Circa 200 homines conventui adsunt.

Homo inventus est die septima Aprili in Anglia mutus, ignotus omnibus, qui ambulabat in litore concentus vestimentis indutus et trahabat libros musicae pro clavichordio. Perterritus erat et totus aqua maris madidus. Ductus est in nausocomio nec dixit ullum verbum. Cum medici ei dederunt stylum, delineavit magna cum praecisione clavichordium. Quam ob rem medici eum duxerunt ad clavichordium quod erat in aedicula nausocomii : vir noster cecinit clavichordio quattuor horas et peritissimus visus est adsentibus. In actis diurnis vulgata est imago clavichordistae perditi : nemo autem jam eum agnovit. Novistisne hunc hominem ?

Mons quidam Apeninus adhuc nomine carens, qui ad iugam Gran Sasso pertinet, nomine papae Iohannis Pauli II abhinc notabitur. In proximitate montis papa ipse olim ambulare solebat.

Monumentum praesidentis pristini Czechoslovakiae Eduardi Benes structum est media in urbe Praga. Cui rei administer rerum externarum vicinae Hungariae reclamat, nam decretis a Benes datis quinque centena Hungarorum necnon duo cum dimidia millionis Theodiscorum e Czechoslovakia anno 1945, bello mundano modo finito, vi expulsi sunt.

Mures Acropolin, arcem illam praeclaram Athenarum, magnis in copiis inhabitant, ludis enim olympicis anni 2004 peractis, nemo plus sordes pavimentorum circa collem iacentes purgat.

Anno 2006 cives Montenegrini plebiscitu decernent utrum cum Serbia in foedere aut suo iure regnari velint. Indagationes opinionum monstrant fautores et adversarios independentiae eodem fere numero Monti Nigrae adesse.

Iam non tantopere quam antea amant Britanni theam bibere, magis magisque aliis potionibus fauces subicientes – putat Helena Shiels cui munus apud institutum mercaturae investigandae Mintel est. Theam coffea, suci pomorum necnon potiones a herbis factae vincant.


Retro ad:

Novissima editio
Summum paginae