XVI. Cum transivisset sabbatum, Maria Magdalia et Maria Iacobi et Salome emerunt aromata, ut cum venissent, ungerent eum.

² Valde mane, primo [die] sabbatorum, veniunt ad monumentum, orto iam sole.

³ Dicebant inter se: ‘Quis revolvet nobis lapidem ab ostio monumenti?’.

⁴ Cum aspexissent, vident revolutum lapidem; erat enim magnus valde.

⁵ Ingressae in monumentum viderunt iuvenem sedentem in dextris, coopertum veste candida, et obstupuerunt.

⁶ Ille vero dicit eis: ‘Nolite expavescere! Iesum quaeritis Nazarenum crucifixum. Surrexit, non est hic; ecce locus, ubi posuerunt eum.

⁷ Sed ite, dicite discipulis eius et Petro: ‹Praecedit vos in Galilaeam. Ibi eum videbitis, sicut dixit vobis›’.

⁸ Egressae fugerunt e monumento; tenebat enim eas tremor et stupor, nec cuiquam dixerunt quidquam, nam timebant.

[Omnia vero, quae praecepta erant eis, qui erant cum Petro, exposuerunt breviter. Post haec apparuit ipse quoque Iesus, et ab oriente usque ad occidentem emisit per illos sanctam et incorruptam praedicationem aeternae salutis. Amen.]

⁹ Cum autem surrexisset mane, primo [die] sabbati, apparuit primum Mariae Magdaliae, e qua eiecerat septem daemonia.

¹⁰ Illa profecta nuntiavit eis, qui cum illo fuerant, lugentibus et flentibus.

¹¹ Illi cum audivissent eum vivere et visum esse ab illa, non crediderunt.

¹² Post haec autem duobus ex illis ambulantibus apparuit in alia effigie, euntibus in agrum.

¹³ Illi cum abissent, nuntiaverunt ceteris; [qui] ne illis quidem crediderunt.

¹⁴ Postremo [autem] recumbentibus ipsis Undecim apparuit et exprobravit incredulitatem eorum et duritiam cordis, quod non crediderant eis, qui viderant eum resuscitatum.

¹⁵ Dixit eis: ‘Profecti in mundum universum depraedicate faustum nuntium omni creaturae.

¹⁶ Qui crediderit et immersus erit, is salvabitur; qui vero non crediderit, condemnabitur.

¹⁷ Signa autem eos, qui crediderint, haec sequentur: in nomine meo daemonia eicient, linguis loquentur novis,

¹⁸ serpentes tollent et si mortiferum quid biberint, non eis nocebit, super aegrotos manus imponent, et bene habebunt’.

¹⁹ Dominus autem Iesus, postquam locutus est eis, assumptus est in caelum et sedit a dexteris Dei.

²⁰ Illi autem egressi praedicaverunt ubique, Domino cooperante et verbum confirmante sequentibus signis.

Scripsit fr.Benedictus Huculak OFM - 22/04/2018

---