X. Post haec autem designauit Dominus alios septuaginta duos et misit illos binos ante faciem suam in omnem ciuitatem et locum, quo erat ipse uenturus.

² Dicebat illis: ‘Messis quidem multa, operarii autem pauci; conrogate ergo Dominum messis, ut mittat operarios in messem suam.

³ Ite; ecce ego mitto uos sicut agnos inter lupos.

⁴ Nolite portare sacculum neque peram neque calceamenta et neminem per uiam salutaueritis.

⁵ In quamcumque domum intraueritis, primum dicite: ‹Pax huic domui›.

⁶ Si ibi fuerit filius pacis, requiescet super illum pax uestra. Sin autem, ad uos reuertetur.

⁷ In eadem autem domo manetote edentes et bibentes, quae apud illos sunt. Dignus enim est operarius mercede sua. Nolite transire de domo in domum.

⁸ In quamcumque ciuitatem intraueritis, et susceperint uos, edunto ea, quae apponantur uobis,

⁹ et curatote infirmos, qui in illa sint, et dicitote illis: ‹Appropinquauit ad uos regnum Dei›.

¹⁰ In quamcumque ciuitatem intraueritis, et non receperint uos, egressi in plateas eius dicite:

¹¹ ‹Etiam puluerem, qui adhaesit nobis ad pedes de ciuitate uestra, extergimus in uos; tamen hoc scitote appropinquauisse regnum Dei›.

¹² Dico uobis: Sodomis in die illa remissius erit quam illi ciuitati.

¹³ Vae tibi, Chorazin! Vae tibi, Bethsaida! Quia si in Tyro et Sidone factae essent uirtutes, quae in uobis factae sunt, olim in cilicio et cinere sedentes paenituissent.

¹⁴ Verumtamen Tyro et Sidoni remissius erit in iudicio quam uobis.

¹⁵ Tu quoque, Capharnaum, num usque in caelum exaltaberis? Vsque in infernum demergeris!

¹⁶ Qui uos audit, is me audit; et qui uos spernit, is me spernit. Qui tamen me spernit, is spernit eum, qui misit me’.

¹⁷ Reuersi sunt autem septuaginta duo cum gaudio dicentes: ‘Domine, etiam daemonia subiciuntur nobis in nomine tuo!’.

¹⁸ Dixit illis: ‘Videbam satanam sicut fulgur cadentem de caelo.

¹⁹ Ecce dedi uobis potestatem calcandi super serpentes et scorpiones et super omnem uirtutem inimici; nec quidquam nocebit uobis.

²⁰ Verumtamen nolite gaudere de eo, quod spiritus uobis subiciuntur. Gaudete tamen, quod nomina uestra scripta sunt in caelis’.

²¹ Illa hora exsultauit in Spiritu Sancto et dixit: ‘Confiteor tibi, Pater, Domine caeli et terrae, quod abscondisti haec a sapientibus et prudentibus et reuelasti ea paruulis. Sic, Pater, quia ita placuit coram te.

²² Omnia mihi tradita sunt a Patre meo; nec quisquam scit, qui sit Filius, nisi Pater, et qui sit Pater, nisi Filius et is, cui uoluerit Filius reuelare’.

²³ Conuersus ad discipulos seorsum dixit: ‘Beati oculi, qui uident ea, quae uidetis.

²⁴ Dico enim uobis: Multi uates et reges uoluerunt uidere ea, quae uos uidetis, et non uiderunt, et audire ea, quae auditis, et non audiuerunt’.

²⁵ Ecce quidam legis peritus surrexit tentans eum [et] dicens: ‘Magister, qua re facta uitam aeternam possidebo?’.

²⁶ Qui dixit ad illum: ‘In lege quid scriptum est? Quomodo legis?’.

²⁷ Qui respondens dixit: ‘Diliges Dominum Deum tuum ex toto corde tuo et ex tota anima tua et ex omnibus uiribus tuis et ex omni mente tua, et proximum tuum sicut teipsum’.

²⁸ Dixit autem illi: ‘Recte respondisti; hoc facito et uiues’.

²⁹ Ille autem, uolens iustificare seimet, dixit ad Iesum: ‘Quis est meus proximus?’.

³⁰ Suscepta autem re Iesus dixit: ‘Homo quidam Ierosolymâ descendebat Ierichonem et incidit in latrones, qui et despoliauerunt eum et, plagis impositis, abierunt, [illo] semiuiuo relicto.

³¹ Accidit autem, ut sacerdos quidam descenderet eadem uia et, uiso illo, praeteriret altero uiae latere.

³² Similiter et Leuita, cum esset secus locum et uideret illum, pertransiit altero uiae latere.

³³ Samaritanus autem quidam iter faciens, uenit secus illum et, uiso illo, misericordiâ motus est,

³⁴ et cum appropinquauisset alligauit uulnera eius infundens oleum et uinum; et situm eum in iumentum suum duxit in stabulum et curam egit eius.

³⁵ Postridie extraxit duos denarios et dedit stabulario et dixit: ‹Curam eius habe, et quodcumque supererogaueris, ego, cum rediuero, reddam tibi›.

³⁶ Quis horum trium uidetur tibi proximus fuisse ei, qui inciderat in latrones?’.

³⁷ Qui dixit: ‘Is, qui fecit misericordiam erga illum’. Dixit autem illi Iesus: ‘Vade et tu facito similiter’.

³⁸ Cum autem irent, ille intrauit in quendam uicum, et mulier quaedam Martha, nomine, excepit eum.

³⁹ Huic erat soror nomine Maria, quae cum sedisset ad pedes Domini, audiebat uerbum eius.

⁴⁰ Martha autem satagebat circa frequens ministerium. Quae stetit et dixit: ‘Domine, non est tibi curae, quod soror mea reliquit me solam ad ministrandum? Ergo dic illi, ut adiuuet me’.

⁴¹ Respondens dixit illi Dominus: ‘Martha, Martha, sollicita es et turbaris de multis,

⁴² sed unum est necessarium. Maria enim optimam partem elegit, quae non auferetur ab ea’.

Scripsit fr.Benedictus Huculak OFM - 02/07/2019

---