De caponata melongenarum

Hoc suave ferculum aestivum Siciliae proprium lectoribus proponitur. Unde nomen Siculum "caponata"? Sunt qui ex "capone", id est gallo castrato, aut ex "capone" (Coryphaena hippurus), gustatu optimo pisce, nomen ortum esse putent, quibus olim ferculum conficere soliti fuerint, aut ex "cauponis" ubi adsumatur.

Tibi ad quattuor convivas satiandos compara:

quattuor melongenas,

duas caepas,

unum hectogramma capparium,

unum apium,

tria matura lycopersica,

unum hectogramma olivarum,

unum poculum aceti,

unum cochlear sacchari, basilici ramulum, copiam olivi et salis.

Subamarum primum umorem melongenarum exprome, ut mos est: melangenas in cubos reseca et sale consperge et per unam horam serva, posthac accurate perlue et panno deterge; deinde in abundanti calido olivo frige, extrahe et sepone. Caepas et apium in subtilia segmenta reseca, cum olivis nucleis orbatis et capparibus in olla breviter frige, deinde lycopersica minutatim secta folliculis seminibusque reiectis superadde et per quindecim minuta coque. Demum melongenas iam frictas in ollam infunde cum poculo aceti et saccharum et per viginti minuta saepe commiscens concoque. In lancem transfer atque exspecta donec tepescat, basilici foliis exorna convivisque praebe.

Nullum vinum mihi ferculo huic, aceti sapido, sociandum videtur, sed aqua frigescens.

Scripsit Herimannus Novocomensis

Caffea 50 libris per poculum!

De cuniculo olivis condito

Iemen terra manducans

Messis tuberum

Nanus Indorum vias mundi mutaturus