„Ephemeridem" scribentes
qui simus explicatur

"Iam diu ego, diurnarius, acta hebdomadalia Latine scripta condere cogitavi, nam, puto, sit linguae Latinae resurgere, adesse ei debent acta talia necnon programmata radiophonica televisificave. Exspectabam tamen hoc temporis momentum cum Latinitas mea plus Ciceroniana esset. Quod cum numquam fieri intellexissem, pessima mea Latinitate rem nihilominus pergere ausus sum."

Talibus verbis ante decem annos Stanislaus Varsoviensis Ephemeridis inceptor principium horum actorum interretialium narrabat.

Cui incepto permulti operam cum ipso Stanislao, cum Albino Francogallo et mecum libenter dederunt, qui omnes (ne succenseant multi, quorum nomina hic non citantur!) enumerari non possunt. Novissimis annis assidue laboris huius participes fuerunt:

Dominicus Caveosanus et Lydia Ariminensis Italici, Nicolaus Gross Germanicus, Paulus Kangiser Chiliensis, Volfgangus Austriacus de variis rebus scribentes,

necnon alii scriptores sicut

Benedictus Huculak OFM Polonus agiographus, Nicolaus Simonides Polonus redactor Lampadis, Sarod Klein Germanus, Thomas Crean et Thomas Davis ex Civitatibus Americae Unitis,

et versuum auctores vel conversores sicut

Aurelius Vidulic Croaticus, Joannes Teresi Italicus, Lydia Ariminensis, Martinus Zythophilus Austriacus.

Albinusque Flaccus, Francogallus nunc Cataloniensis, alchimista artis paginas in interrete struendi, situm interretiale rexit et laetalia vira acriter oppugnavit.

Omnibus scriptoribus gratiae imo ex corde aguntur, alii invitantur...

Herimannus Novocomensis

26 Iunii 2014

==============

=============