Vita XXXIII brevibus fabulis enarrata

(33 sceny z zycia - 33 Scenes from Life)

Polonia - Germania anno MMVIII

Direxit et scripsit Malgoska Szumowska, in scaenam reduxit et histriones delegit Malgorzata Adamska, pelliculam exstruxit Jacek Drosio, sonitum curavit Michal Dominowski, imagines curavit Michal Englert, musicam curavit Pawel Mykietyn, vestimenta curaverunt Julia Jarza-Brataniec et Katarzyna Lewinska; partes maximi momenti egerunt: Julia Jentsch (Julia), Peter Gantzler (Adrian, Juliae amicus), Malgorzata Hajewska-Krzysztofik (Juliae mater), Andrzej Hudziak (Juliae pater), Maciej Stuhr (Juliae vir), Roman Gancarczyk (Krzysiek, Juliae frater); produxerunt Pandora Film Production/STI Studio Filmowe et Shot Szumowski necnon ZDF/ARTE, Raimond Goebel, Karl Baumgartner, Teresa Dwoezecka, Malgoska Szumowska, Mikael Olsen, Meinolf Zurhorst; distribuit Real Fiction Filmverleih.

Locarni, in certamine mundano filmico, praemium singulare iudicum tributum est huic pelliculae iuvenis artificis Polonae, cui rete televisificum Germanicum facultatem dedit operae producendae.

Julia, musici mulier Polona, familiae suae amans, se sperat felicem exitum habituram esse ut photographematum auctricem. Sed propter tumorem matris mortiferum tempora fausta de improviso corruunt: umbra mortis omnes involvit. Julia dolorem suum aliter alio die patefacit, tum imagines tumorum insane contemplans, cum ridens sine modo, pater in nimii alcoholis vitium incidit, omnia demum destruuntur. Magna cum peritia partes primas agit Julia Jentsch (Julia), quam iam spectatores cognoverant ut adolescentem Sophiam Scholl in praeclaro cinemate "Alba rosa" (Die weisse Rose), obstinate nazistis hostilem usque ad mortem. Nunc varietas instabilium animi motuum mire patefiunt in mulieris actione. Post operam demonstratam dixit auctrix Malgoska Szumowska se de se ipsa enarrare voluisse, cui similia damna anno XXXIII vitae suae evenissent: brevia scripta diebus illis anxiis in XXXIII chartulis scripserat. Cum hanc singularem numeri reversionem animadvertit, se pelliculam filmicam conficere statuit.

Etiam spectatori anxietatis causa est cinema illud, sed operae pretium est.

Scripsit Herimannus Novocomensis

De amore et urbe
(Sex and the City)

Crystallinam calvam sequi

De musicis visitantibus

Michaël Clayton

Leones pro agnis