|
|||||||||||
|
|
OECONOMIA
Mercatus Dubaiensis ad res oeconomicas Iranianas maximi adhuc est momenti
Irania propter consilia atomica diffamata Dubaiani quoque, qui magnam et copiosam cum Iranianis mercaturam facere solebant, operam dant, ne diutius pro latebris negotiatorum Iraniorum habeantur. Nam Civitatibus Unitis Americae urgentibus Dubaiani commercium adhuc liberum, quod habent cum Iranianis, magis magisque coercent. Nunc enim magistratibus licet prohibere, ne quae res exportentur, quibus „securitas nationalis periclitetur“. Ex qua lege XL fere societates adhuc diremptae sunt, quae consiliis a Nationibus Unitis captis fraudem fecissent. In tanta coercitione commercium , quod est inter Dubaianos et Iranianos, tamen continuari apparet, cum res a societatibus exteris supportatae ex emiratu Dubaiano in Iraniam perveniunt. In quibus rebus non solum esse pannos aut machinas lavatorias, sed etiam res ad aeroplana aut computatra pertinentes, quae rei militari usui essent. Confiniis velut cribrum perforatis etiam posthac fore, ut Iraniani, quodcumque vellent, acciperent, Mortesa Masumsadeh navicularius dixisse fertur. Suum quamque societatem procuratorem habere, qui pro se in emiratu ageret. Ita VIII milia societatum Iraniarum in tabulas Dubaianas esse relata, ex quibus MCC id tantum curarent,ut mercatura inter utramque civitatem praestaretur. Institutum Americanum oeconomicum “fundatio nova Americana“ (New America Foundation) appellatum non quidem dubitat, quin Dubai etiam nunc ad oeconomiam Iranianam maximi sit momenti. Quae res tabulis publicis Dubaianis comprobatur: inter annum MMV et MMIX mercaturam inter utramque civitatem esse triplicatam. Scripsit Volfgangus Austriacus - - 01/02/2010 16h24
|
BREVES
SOCIALIA
RELIGIO
INSOLITA
IN ORBE
|
|||||||||
