|
|||||||||||
|
|
LIBRI
DEESSE GENTEM IUDAEAM DOCET PROFESSOR SHLOMO SAND Iudaei ficticii?
Futurum statum Israeliae Shlomo Sand praevidet ut communis civitatis duarum aequi iuris gentium, Iudaeorum scilicet et Araborum. Si eadem iura, quibus hodie Iudaei utuntur, Arabis non dabuntur, hi citius aut serius arma contra Israelianos capient. Et non agitur hic de Arabis Cisiordaniae (Ripae Occidentalis) aut zonae Gazeticae iam hodie bene armatis, sed de Arabicae gentis incolis Israeliae propriae, ubi exempli gratia in multis locis Galilaeae iam nunc Arabi gens numerosior sunt. Quae Galilaea, nisi res mutabuntur, fiet Israeliae idem quod Campus Merulanus (Kosovo) erat Serbiae - vaticinatur Sand. * Shlomo Sand, The Invention of the Jewish People (Inventio populi Iudaei). Domus editoria Verso Books, 2009. Scripsit Stanislaus Varsoviensis iconoclastes.blog.onet.pl |
||||||||||
Unam gentem Iudaeam numquam extasse at qui hodie se
Iudaei nuncupant esse re vera nepotes variarum gentium Asiae,
Africae et Europae Orientalis, quae olim sibi fidem Iudaicam
adoptaverunt. Nam inter II saeculum ante et IV post Christum
natum erat fides Iudaica maximi in mundo momenti religio
monotheistica, quae semper tunc studebat novos asseclas sibi
conciliare cuique haud parvus numerus populorum se adiungere
decrevit. Quod probat cauta lectio Talmudi necnon aliorum fontium
Araborum, pristinorum Christianorum, paganorum atque ipsorum
Iudaeorum. Ita censet professor historiae Universitatis
Telavivensis Shlomo Sand (photographemate a laeva monstratur),
cuius liber novissimus, ubi sententias de his rebus exponat, 19
septimanis habebatur unus inter decem maxime lectoribus
Israelianis gratos libros omnis generis; quod numquam in Israelia
contigerat unicuique libro scientifico. Qui liber modo Anglice
quoque in lucem est datus.
Maxime irritat
multos lectores Iudaeos thesis professoris Sand, qua docet
expulsionem Iudaeorum e Palaestina a Romanis duce Hadriano (rebellione
Simonis Bar Kochba annorum 132-136 pacata) numquam fuisse.
Adfuisse maximam caedem, prohibitionem deinde cultus Iudaeici,
expulsionem ex ipsa urbe Hierosolyma sed non e tota terra; multi
autem Iudaei tunc, sicut iam prius, sua sponte alias partes
Imperii Romani petebant. Expulsio haec demum saeculo XIX ficte
inventa est a Iudaeis, ut stimulum haec fabula daret motui
Sionistico, cogentem Iudaeos ex omni orbe terrarum in Israeliam
remigrare. Iudaeos autem, qui in Palaestina manserunt, post
impetum Araborum saeculi VII islamo se convertisse. Ita putat
Sand hodiernos terroristas gregis Hamas genetice propiores Iuaeis
antiquis esse quam in eos sclopetantes milites Islaelianos, qui
ut (re)migratores e variis mundi partibus haud parvam copiam
sanguinis alieni in Israeliam secum adportaverunt.
