Neo-Eboraco ex urbe – Operationibus parangêicîs servata iam est vita innumerabilium hominum e corde laborantium: In iisdem medici in locum arteriarum cordis calcificatarum supponunt venas validas e crure exsectas easdemque struunt praeter vasa valdê coartata aut prorsus conclusa.

Haec ratio technica inventa et a.1964 (millesimo nongentesimo sexagesimo quarto) primum adhibita est a Michaele DeBakey medico US-Americano. Nunc Michael mortuus est aetate 99 (undecentum) annorum. "Qui vir" Ronaldus Girotto, praeses nosocomii Methodistici, in quo Michael ex anno 1949 (millesimo nongentesimo undequinquagesimo) operatus est, inquit „condiciones hominum reddidit meliores necnon valuit ad vitam generationum futurarum". In summâ Michael in cursu suo honorum direxit plures quam sexaginta milia operationum.

Ephemeris, c.t. "Houston Chronicle", refert eundem veteranum medicinae mortuum esse causâ naturali. Michael propter operationes suas parangeicas et cordium transplantationes illustrissimas habetur pro uno ex saeculi vicesimi chirurgis omnium maximis.

A Michaele curati sunt homines insignissimi, velut Marlena Dietrich actrix cinematographica praestantissima, Lyndon Johnson praeses quondam Civitatum Unitarum necnon Boris Jelzin Russiae quondam praeses. Ex anno 1975 (millesimo nonagesimo septuagesimo quinto) idem chirurgus connubio coniunctus erat cum Catharina Fehlhaber Germanâ actrice cinematographicâ, quam pernoverat mediante Franco Sinatra.

Biennio anno ante non multum afuit, quin Michael moreretur – sed servatus est methodo, quam ipse invenerat: Illo tempore sectionem chirurgicam subiit propter aortam morbosê dilatatam. Michael autem reconvaluit tanto, ut huius anni mense Aprili adhuc accipere posset nomisma aureum, quod sibi oblatum est a Congressu US-Americano ad opus vitae suae honestandum.