XXIV. sed primo [die] sabbatorum, profundo diluculo uenerunt ad monumentum portantes aromata, quae parauerant.

² Inuenerunt lapidem reuolutum a monumento,

³ et ingressae non inuenerunt corpus Domini Iesu.

⁴ Dum mente haesitant de isto, factum est, ut ecce duo uiri sisterent apud eas in ueste fulgenti.

⁵ Cum autem timerent et declinarent uultum in terram, [illi] dixerunt ad eas: ‘Cur quaeritis uiuentem cum mortuis?

⁶ Non est hic, sed surrexit. Recordamini, qualiter locutus sit uobis, cum adhuc in Galilaea esset,

⁷ dicens: ‹Oportet Filium hominis tradi in manus hominum peccatorum et crucifigi et die tertio resurgere›’.

⁸ Recordatae sunt uerba eius

⁹ et regressae a monumento nuntiauerunt haec omnia [illis] Vndecim et ceteris omnibus.

¹⁰ Erat autem Maria Magdalia et Ioanna et Maria Iacobi; et ceterae cum eis dicebant haec ad emissarios.

¹¹ Haec uerba uisa sunt eis deliramentum, nec credebant eis.

¹² Petrus tamen surrexit et cucurrit ad monumentum et inclinatus uidet linteamina sola; et rediit ad sua mirans id, quod factum erat.

¹³ Ecce duo ex illis ibant eodem die in uicum, qui erat spatio stadiorum sexaginta ab Ierosolyma, nomine Emmaus;

¹⁴ et illi loquebantur ad alterutrum de eis omnibus, quae acciderant.

¹⁵ Cum fabularentur et secum quaererent, factum est, ut ipse Iesus, cum appropinquauisset, iret cum eis.

¹⁶ Oculi tamen eorum tenebantur, ne eum agnoscerent.

¹⁷ Dixit ad eos: ‘Quae sunt haec uerba, quae confertis ad alterutrum ambulantes?’. Steterunt tristes.

¹⁸ Respondens unus, cui nomen Cleopas, dixit ad eum: ‘Tune solus habitas Ierosolymae, et non cognouisti ea, quae facta sunt in ea his diebus?’.

¹⁹ Quibus ille dixit: ‘Quae?’. Illi dixerunt ei: ‘De Iesu Nazareno, qui fuit uir uates, potens in opere et verbo coram Deo et omni populo;

²⁰ et quomodo eum tradiderint pontifices et principes nostri in damnationem mortis et crucifixerint eum.

²¹ Nos autem sperabamus fore, ut ille redimeret Israel, verum super haec omnia hodie tertius [est] dies, ex quo haec facta sunt.

²² Sed etiam mulieres quaedam ex nostris terruerunt nos, quae ante lucem fuerunt ad monumentum

²³ et, non inuento corpore eius, uenerunt dicentes se uisionem quoque angelorum uidisse, qui dicerent eum uiuere.

²⁴ Abierunt quidam ex nostris ad monumentum et ita inuenerunt, sicut mulieres dixerant, illum uero non uiderunt’.

²⁵ Is dixit ad illos: ‘O stulti et tardi corde ad credendum in omnia, quae locuti sunt uates!

²⁶ Nonne oportuit Christum haec pati et intrare in gloriam suam?’.

²⁷ Cum coepisset a Moyse et omnibus uatibus, interpretabatur illis in omnibus Scripturis ea, quae de ipso erant.

²⁸ Appropinquauerunt uico, quo ibant, et ille se finxit esse iturum longius.

²⁹ Coëgerunt eum dicentes: ‘Mane nobiscum, quoniam aduesperascit et dies iam inclinatus est’. Intrauit, ut maneret cum illis.

³⁰ Cum recumberet cum eis, factum est, ut sumptum panem et fractum porrigeret eis.

³¹ Aperti sunt oculi eorum, et cognouerunt eum; et ille euanuit ab eis.

³² Dixerunt ad alterutrum: ‘Nonne cor nostrum ardens erat in nobis, cum loqueretur nobis in uia et aperiret Scripturas nobis?’.

³³ Cum surrexissent eadem hora, regressi sunt Ierosolymam et inuenerunt congregatos [illos] Vndecim et eos, qui cum illis erant,

³⁴ dicentes: ‘Surrexit Dominus uere et apparuit Simoni’.

³⁵ Illi narrabant ea, quae gesta erant in uia, et quomodo cognouissent eum in fractione panis.

³⁶ Dum haec autem loquuntur, ille stetit in medio eorum et dicit eis: ‘Pax uobis!’.

³⁷ Conturbati uero et conterriti existimabant se spiritum uidere.

³⁸ Dixit eis: ‘Cur turbati estis, et quare cogitationes ascendunt in corda uestra?

³⁹ Videte manus meas et pedes meos, quod ipse ego sum! Palpate me et uidete, quia spiritus carnem et ossa non habet, sicut me uidetis habere’.

⁴⁰ Cum hoc dixisset, ostendit eis manus et pedes.

⁴¹ Adhuc autem illis non credentibus ob gaudium et mirantibus, dixit eis: ‘Habetisne hic aliquid comestibile?’.

⁴² Qui obtulerunt ei partem piscis assi;

⁴³ et sumptum coram illis comedit.

⁴⁴ Dixit autem ad eos: ‘Haec sunt uerba, quae locutus sum ad uos, cum adhuc essem uobiscum: necesse esse impleri omnia, quae scripta sunt in lege Moysis et uatum et in psalmis de me’.

⁴⁵ Tunc aperuit illis sensum, ut intellegerent Scripturas.

⁴⁶ Dixit eis: ‘Sic scriptum est: Christo patiendum esse et resurgendum a mortuis die tertio,

⁴⁷ et depraedicandam in nomine eius conuersionem in remissionem peccatorum in omnes gentes, cum coeperitis ab Ierosolyma.

⁴⁸ Vos estis testes horum,

⁴⁹ et ecce ego mitto promissionem Patris mei in uos. Vos autem considete in urbe, quoad induamini uirtutem ex alto’.

⁵⁰ Eduxit autem eos foras usque Bethaniam et, eleuatis manibus suis, benedixit eis.

⁵¹ Cum benediceret eis, factum est, ut recederet ab eis et ferretur in caelum.

⁵² Illi, cum eum uenerati essent, regressi sunt Ierosolymam cum gaudio magno

⁵³ et erant semper in templo benedicentes Deum.

Scripsit fr.Benedictus Huculak OFM - 02/07/2020

---