XI. Factum est cum esset orans in quodam loco, ut cum cessauisset, diceret unus e discipulis eius ad eum: ‘Domine, doce nos orare, sicut et Ioannes docuit discipulos suos’.

² Dixit illis: ‘Cum oratis, dicitote: ‹Pater, sanctificetur nomen tuum, adueniat regnum tuum;

³ panem nostrum cotidianum dato nobis cotidie,

⁴ et dimitte nobis peccata nostra, si quidem et ipsi dimittimus omni debenti nobis, et ne nos induxeris in tentationem›’.

⁵ Dixit ad eos: ‘Quis uestrum habebit amicum et ibit ad eum media nocte et dicet ei: ‹Amice, commoda mihi tres panes,

⁶ quoniam amicus meus uenit de uia ad me, et non habeo, quod ponam ante illum›.

⁷ Ille de intus respondens dicat: ‹Noli mihi molestus esse: iam ostium clausum est et pueri mei mecum sunt in cubili; non possum surgere et dare tibi›.

⁸ Dico uobis: Etsi non dabit ei, cum surrexerit, ideo quod amicus suus est, tamen propter importunitatem eius, surget et dabit ei [panes] quotquot habet necessarios.

9 Ego dico uobis: Petitote, et dabitur uobis; quaeritote, et inuenietis; pulsatote, et aperietur uobis.

¹⁰ Omnis enim qui petit, accipit; et qui quaerit, inuenit; et pulsanti aperietur.

¹¹ Si uero quem ex uobis patrem filius petiuerit piscem, num pro pisce serpentem dabit illi?

¹² Vel si petiuerit ouum, num porriget illi scorpionem?

¹³ Ergo si uos, cum sitis mali, nouistis dona bona dare filiis uestris, quanto magis Pater de caelo dabit Spiritum Sanctum petentibus se’.

¹⁴ Erat eiciens daemonium, et illud erat mutum; et factum est, ut loqueretur mutus, cum daemonium exiret. Admiratae sunt turbae.

¹⁵ Quidam autem ex illis dixerunt: ‘In Beelzebule, principe daemoniorum, [ille] eicit daemonia’.

¹⁶ Alteri uero, tentantes, signum de caelo quaerebant ab eo.

¹⁷ Ille tamen, sciens cogitationes eorum, dixit eis: ‘Omne regnum in seipso diuisum desolatur, et domus super domum cadit.

¹⁸ Si autem et satanas quoque in seipso diuisus est, quomodo stabit regnum eius? Quia dicitis me in Beelzebule daemonia eicere.

¹⁹ Si autem ego in Beelzebule eicio daemonia, filii uestri in quo eiciunt? Propterea illi iudices uestri erunt.

²⁰ Si autem digito Dei eicio daemonia, profecto peruenit super uos regnum Dei.

²¹ Cum fortis armatus custodit atrium suum, in pace sunt ea, quae possidet.

²² Si autem fortior illo, cum superuenerit, uicerit eum, uniuersa arma eius, quibus confidebat, aufert et spolia eius distribuit.

²³ Qui non est mecum, aduersum me est; et qui non colligit mecum, dispergit.

²⁴ Cum immundus spiritus exiuerit ex homine, perambulat per loca inaquosa quaerens requiem; et non inueniens dicit: ‹Reuertar in domum meam, unde exiui›.

²⁵ Cum uenerit, inuenit [illam] scopa mundatam et ornatam.

²⁶ Tunc proficiscitur et assumit septem alios spiritus nequiores se, et ingressi habitant ibi; et sunt nouissima hominis illius peiora prioribus’.

²⁷ Factum est autem, cum haec diceret, ut quaedam mulier e turba elata uoce diceret ei: ‘Beatus uenter, qui te portauit, et ubera, quae suxisti!’.

²⁸ Ille autem dixit: ‘Quin etiam beati, qui audiunt uerbum Dei et custodiunt [illud]!’.

²⁹ Turbis autem concurrentibus, [ille] coepit dicere: ‘Generatio haec est generatio nequam. Signum quaerit, et signum non dabitur illi, nisi signum Ionae.

³⁰ Sicut enim Ionas fuit signum Niniuitis, ita erit et Filius hominis generationi huic.

³¹ Regina austri surget in iudicio cum uiris generationis huius et condemnabit illos, quia uenit a finibus terrae, ut audiret sapientiam Salomonis, et ecce [aliquid] plus Salomone [est] hic.

³² Viri Niniuitae surgent in iudicio cum generatione hac et condemnabunt illam, quia conuersi sunt ad praedicationem Ionae, et ecce [aliquid] plus Ionâ [est] hic.

³³ Nemo lucernam accendit et in abscondito ponit neque sub modio, sed super candelabrum, ut ei, qui ingrediuntur, uideant lumen.

³⁴ Lucerna corporis est oculus tuus. Si oculus tuus fuerit simplex, totum corpus tuum lucidum erit; si autem nequam fuerit, etiam corpus tuum tenebrosum erit.

³⁵ Vide ergo, ne lumen, quod in te est, tenebrae sint.

³⁶ Ergo si corpus tuum totum lucidum erit non habens ullam partem tenebrarum, erit lucidum totum, sicut cum lucerna fulgore suo illuminat te’.

³⁷ Cum loqueretur, rogauit eum quidam pharisaeus, ut pranderet apud se; et ingressus recubuit.

³⁸ Pharisaeus autem, cum uidisset, miratus est, quod [ille] non sibi immerserat manus in aquam ante prandium.

³⁹ Dixit ad illum Dominus: ‘Nunc uos pharisaei mundatis id, quod de foris est calicis et catini. Quod autem intra uos est, plenum est rapina et iniquitate.

⁴⁰ Stulti! Nonne is, qui fecit id, quod de foris est, fecit etiam id, quod de intus est?

⁴¹ Verumtamen ea, quae [illis] insunt, date misericordiale; et ecce omnia munda sunt uobis.

⁴² Attamen uae uobis pharisaeis, quia decimatis mentam et rutam et omne olus, et praeteritis iudicium et caritatem Dei! Haec autem oportuit facere, et illa non omittere.

⁴³ Vae uobis pharisaeis, quia diligitis primum sedile in congregationibus et salutationes in foris!

⁴⁴ Vae uobis, quia estis ut monumenta, quae non parent, et homines ambulantes supra nesciunt!’.

⁴⁵ Respondens autem quidam ex legis peritis dixit ei: ‘Magister, haec dicens etiam nobis contumeliam facis’.

⁴⁶ Qui dixit: ‘Etiam uobis legis peritis uae, quia oneratis homines oneribus, quae portari nequeunt, et ipsi uno digito uestro non tangitis onera!

⁴⁷ Vae uobis, quia aedificatis monumenta uatum, patres autem uestri occiderunt illos!

⁴⁸ Profecto testamini et consentitis cum operibus patrum uestrorum, quoniam illi quidem eos occiderunt, uos autem aedificatis.

⁴⁹ Propterea et sapientia Dei dixit: ‹Mittam ad illos uates et emissarios, et ex illis [aliquos] occident et persequentur,

⁵⁰ ut requiratur sanguis omnium uatum, qui effusus est a constitutione mundi, a generatione ista,

⁵¹ a sanguine Abel usque ad sanguinem Zachariae, qui periit inter altare et aedem›. Ita dico uobis: Requiretur ab hac generatione.

⁵² Vae uobis legis peritis, quia tulistis clauem scientiae! Ipsi non introistis, et eos, qui introibant, prohibuistis’.

⁵³ Cum autem inde exiuisset, coeperunt scribae et pharisaei uehementer aggredi et eum prouocare ad loquendum de compluribus,

⁵⁴ insidiantes ei, ut caperent aliquid ex ore eius.

Scripsit fr.Benedictus Huculak OFM - 21/07/2019

---