XX. Quodam die, docente illo populum in templo et fauste nuntiante, factum est, ut superuenirent pontifices et scribae cum senioribus,

² et loquentes ad eum dicerent: ‘Dic nobis, qua potestate haec facias, uel quis sit, qui dedit tibi potestatem hanc?’.

³ Respondens autem dixit ad illos: ‘Interrogabo uos et ego uerbum; et dicite mihi:

⁴ Ioannis immersio e caelone erat an ex hominibus?’.

⁵ Qui cogitabant inter se dicentes: ‘Si dixerimus: ‹E caelo›, dicet: ‹Quare non credidistis illi?›;

⁶ si autem dixerimus: ‹Ex hominibus›, plebs uniuersa lapidabit nos: certi enim sunt Ioannem uatem esse’.

⁷ Responderunt se nescire, unde esset.

⁸ Iesus dixit eis: ‘Neque ego dico uobis, qua potestate haec faciam’.

⁹ Coepit autem dicere ad populum collationem hanc: ‘Homo plantauit uineam et locauit eam colonis, et [ipse] peregre fuit satis longis temporibus.

¹⁰ Tempore [constituto] misit ad colonos seruum, ut de fructu uineae darent sibi. Coloni tamen caesum dimiserunt inanem eum.

¹¹ Denuo alium seruum misit. Illi tamen etiam illum caesum et contumeliâ affectum dimiserunt inanem.

¹² Denuo tertium misit. Illi tamen etiam hunc uulneratum eiecerunt.

¹³ Dixit autem dominus uineae: ‘Quid faciam? Mittam filium meum dilectum; forsitan hunc reuerebuntur’.

¹⁴ Quem cum uidissent coloni, cogitauerunt inter se dicentes: ‹Hic est heres. Occidamus eum, ut nostra fiat hereditas›.

¹⁵ Eiectum eum extra uineam occiderunt. Ergo quid faciet illis dominus uineae?

¹⁶ Veniet et perdet colonos istos et dabit uineam aliis’.Quo audito, dixerunt: ‘Absit!’.

¹⁷ Qui aspiciens eos dixit: ‘Quid est igitur id, quod scriptum est: ‹Lapis, quem reprobauerunt aedificantes, factus est caput anguli›?

¹⁸ Omnis, qui ceciderit supra illum lapidem, conquassabitur; super quem uero ceciderit, eum comminuet’.

¹⁹ Quaerebant scribae et pontifices mittere in eum manus illa hora, et timuerunt populum. Cognouerunt enim ad semet eum dixisse collationem hanc.

²⁰ Cum obseruauissent, miserunt insidiatores, qui se iustos simularent, ut caperent eum in verbo, et sic traderent eum principatui et potestati praesidis.

²¹ Interrogauerunt eum dicentes: ‘Magister, scimus te recte dicere et docere, neque accipere personam, sed in ueritate uiam Dei docere.

²² Nobis licetne dare tributum Caesari an non?’.

²³ Intellecto autem dolo illorum, dixit ad eos:

²⁴ ‘Ostendite mihi denarium. Cuius habet imaginem et inscriptionem?’.

²⁵ Qui dixerunt: ‘Caesaris’. Qui dixit ad illos: ‘Ergo reddite ea, quae Caesaris sunt, Caesari et ea, quae Dei sunt, Deo’.

²⁶ Non potuerunt uerbum eius reprehendere coram populo et tacuerunt mirati responso eius.

²⁷ Cum autem accessissent quidam sadducaeorum, qui negant esse resurrectionem, interrogauerunt eum

²⁸ dicentes: ‘Magister, Moyses scripsit nobis: Si frater alicuius mortuus esset habens uxorem et hic sine filiis fuisset, ut frater eius duceret illam uxorem et suscitaret semen fratri suo.

²⁹ Itaque septem fratres erant: et primus duxit uxorem et mortuus est sine filiis;

³⁰ et secundus

³¹ et tertius duxit eam, similiter tamen et septem non reliquerunt filios et mortui sunt.

³² Vltima mortua est etiam mulier.

³³ Mulier igitur in resurrectione, cuius eorum uxor erit? Si quidem septem habuerunt eam uxorem’.

³⁴ Dixit eis Iesus: ‘Filii huius saeculi uxores ducunt et nubunt;

³⁵ ei uero, qui digni habentur saeculo illo et resurrectione ex mortuis, neque uxores ducunt neque nubunt.

³⁶ Neque enim ultra mori possunt, nam sunt aequales-angelis et filii sunt Dei, cum sint filii resurrectionis.

³⁷ Quod uero resurgunt mortui, etiam Moyses ostendit ad rubum, sicut dicit [Scriptura]: ‹Dominum Deum Abrahami et Deum Isaaci et Deum Iacobi›.

³⁸ Deus autem non est [Deus] mortuorum, sed uiuorum: omnes enim uiuunt ei’.

³⁹ Respondentes autem quidam scribarum dixerunt: ‘Magister, bene dixisti’.

⁴⁰ Amplius non audebant eum interrogare quidquam.

⁴¹ Dixit autem ad illos: ‘Quomodo dicunt Christum filium esse Dauidis?

⁴² Ipse enim Dauid dicit in libro psalmorum: ‹Dixit Dominus Domino meo: Sede a dextris meis,

⁴³ donec ponam inimicos tuos scabellum pedum tuorum›.

⁴⁴ Dauid igitur Dominum illum uocat; et quomodo filius eius est?’.

⁴⁵ Audiente autem omni populo, dixit discipulis suis:

⁴⁶ ‘Attenditote a scribis, qui uolunt ambulare in longis uestibus et amant salutationes in foris et prima sedilia in congregationibus et primos discubitus in conuiuiis,

⁴⁷ qui deuorant domos uiduarum et specie orant longe. Hi maiorem sument damnationem’.

Scripsit fr.Benedictus Huculak OFM - 13/02/2020

---