XVIII. Dicebat autem ad illos collationem – ex qua oportet semper orare et non deficere –,

² dicens: ‘Iudex quidam erat in quadam ciuitate, qui Deum non timebat nec hominem reuerebatur.

³ Vidua autem erat in ciuitate illa et ueniebat ad eum dicens: ‹Vindica me ab aduersario meo›.

⁴ Nolebat per multum tempus, sed postea dixit intra se: ‹Etsi Deum non timeo nec hominem reuereor,

⁵ tamen quia molesta est mihi haec uidua, uindicabo illam, ne usque in finem ueniens suggillet me›’.

⁶ Dixit autem Dominus: ‘Audite, quid dicat iniquus iudex.

⁷ Deus autem nonne faciet uindictam electorum suorum clamantium ad se die ac nocte, et num morabitur erga illos?

⁸ Dico uobis: Cito faciet uindictam eorum. Verumtamen Filius hominis, cum uenerit, putas, inueniet fidem in terra?’.

⁹ Dixit autem etiam ad quosdam, qui in se confidebant tamquam iusti et aspernabantur ceteros, hanc collationem:

¹⁰ ‘Duo homines ascenderunt in templum, ut orarent: unus pharisaeus et alter portitor.

¹¹ Pharisaeus, cum stetisset, haec apud se precabatur: ‹Deus, gratias ago tibi, quod non sum sicut ceteri hominum: raptores, iniusti, adulteri, uelut etiam hic portitor.

¹² Ieiuno bis in sabbati circulo, decimas do omnium, quae acquisiui›.

¹³ Portitor autem a longe stans nolebat ne oculos quidem ad caelum leuare, sed percutiebat pectus suum dicens: ‹Deus, propitius esto mihi peccatori›.

¹⁴ Dico uobis: Descendit hic iustificatus in domum suam respectu illius: quia omnis, qui se exaltat, humiliabitur, et qui se humiliat, exaltabitur’.

¹⁵ Afferebant autem ad illum etiam infantes, ut eos tangeret. Quod cum uidissent discipuli, increpabant illos.

¹⁶ Iesus tamen aduocauit illos dicens: ‘Sinite pueros uenire ad me et nolite uetare eos. Talium enim est regnum Dei.

¹⁷ Amen dico uobis: Quicumque non acceperit regnum Dei sicut puer, non intrabit in illud’.

¹⁸ Interrogauit eum quidam princeps dicens: ‘Magister bone, qua re facta uitam aeternam possidebo?’.

¹⁹ Dixit autem ei Iesus: ‘Cur me dicis bonum? Nemo [est] bonus nisi solus Deus.

²⁰ Mandata nouisti: Ne adulteraueris, ne occideris, ne furtum feceris, ne falso testatus sis, honorato patrem tuum et matrem’.

²¹ Qui dixit: ‘Haec omnia custodiui a iuuentute’.

²² Quo audito, Iesus dixit ei: ‘Adhuc unum tibi deest: omnia, quae habes, uende et da pauperibus, et habebis aerarium in caelo: et ueni, sequere me’.

²³ Qui cum audiuisset haec, contristatus est, quia diues erat ualde.

²⁴ Iesus autem, cum uidisset eum contristatum esse, dixit: ‘Quam difficile [est] ei, qui pecunias habent, intrant in regnum Dei.

²⁵ Facilius est enim camelum per foramen acûs intrare, quam diuitem intrare in regnum Dei’.

²⁶ Dixerunt ei, qui audiebant: ‘Et quis potest saluari?’.

²⁷ Qui dixit: ‘Quae impossibilia sunt apud homines, ea possibilia sunt apud Deum’.

²⁸ Dixit autem Petrus: ‘Ecce nos dimisimus propria et secuti sumus te’.

²⁹ Qui dixit eis: ‘Amen dico uobis: Nemo est, qui reliquerit domum uel uxorem uel fratres uel parentes uel filios propter regnum Dei,

³⁰ et non recipiat multo plura hoc tempore, et in saeculo uenturo uitam aeternam’.

³¹ Assumpsit autem Duodecim et dixit eis: ‘Ecce ascendimus Ierosolymam, et consummabuntur omnia, quae scripta sunt per uates de Filio hominis.

³² Tradetur enim gentibus et illudetur et contumeliis afficietur et conspuetur;

³³ et postquam flagellauerint, occident eum, et die tertio resurget’.

³⁴ Illi nihil horum intellexerunt; et erat uerbum istud absconditum ab eis, neque intellegebant ea, quae dicebantur.

³⁵ Cum autem appropinquaret Ierichoni, factum est, ut caecus quidam sederet ad uiam mendicans.

³⁶ Cum audiret turbam praetereuntem, interrogabat, quid esset hoc.

³⁷ Dixerunt autem ei: ‘Iesus Nazarenus transit’.

³⁸ Clamauit dicens: ‘Iesu, fili Dauidis, miserere mei!’.

³⁹ Ei, qui praeibant, increpabant illum, ut taceret, sed ille multo magis clamabat: ‘Fili Dauid, miserere mei!’.

⁴⁰ Iesus autem cum stetisset, iussit illum adduci ad se. Cum appropinquasset, interrogauit eum:

⁴¹ ‘Quid uis faciam tibi?’. Qui dixit: ‘Domine, ut uideam’.

⁴² Iesus dixit ei: ‘Respice! Fides tua saluauit te’.

⁴³ Confestim uidit et sequebatur eum magnificans Deum; et omnis populus, cum uidisset, dedit laudem Deo.

Scripsit fr.Benedictus Huculak OFM - 25/12/2019

---