XXI. Cum autem aspexisset, uidit diuites iacientes munera sua in aerarium.

² Vidit autem quandam uiduam pauperculam iacientem illuc minuta duo;

³ et dixit: ‘Vere dico uobis: Vidua haec pauper iecit plus quam omnes.

⁴ Hi enim omnes ex abundantia sua iecerunt in munera; haec autem ex inopia sua misit omnem uictum suum, quem habebat’.

⁵ Quibusdam dicentibus de templo illud ornatum esse pulchris lapidibus et donariis, dixit:

⁶ ‘Venient dies, quibus in eis, quae uidetis, non relinquetur lapis super lapidem, qui non destruatur’.

⁷ Interrogauerunt autem eum dicentes: ‘Magister, quando igitur haec erunt, et quod signum, cum fieri incipient?’.

⁸ Qui dixit: ‘Videtote, ne seducamini. Multi enim uenient, in nomine meo dicentes: ‹Ego sum› et ‹Tempus appropinquauit›. Ne iueritis post eos.

⁹ Cum autem audieritis proelia et seditiones, ne timueritis: oportet enim primum haec fieri, sed non statim finis [erit]’.

¹⁰ Tunc dicebat illis: ‘Surget gens aduersus gentem, et regnum aduersus regnum;

¹¹ et terrae motus magni et per loca fames et pestilentiae erunt terroresque et de caelo signa magna erunt;

¹² sed ante haec omnia inicient uobis manus suas et persequentur tradentes in congregationes et custodias, et trahemini ad reges et praesides propter nomen meum.

¹³ Hoc tamen continget uobis in testimonium.

¹⁴ Ponite igitur in cordibus uestris non praemeditari quemadmodum respondeatis,

¹⁵ nam ego dabo uobis os et sapientiam, cui non poterunt resistere uel contradicere ulli aduersarii uestri.

¹⁶ Trademini autem etiam a parentibus et fratribus et cognatis et amicis, et morte afficient [aliquos] ex uobis,

¹⁷ et eritis odio omnibus propter nomen meum,

¹⁸ et capillus de capite uestro non peribit.

¹⁹ In patientia uestra possidebitis animas uestras.

²⁰ Cum autem uideritis Ierosolymam circumdari ab exercitu, tunc scitote appropinquauisse desolationem eius.

²¹ Tunc ei, qui in Iudaea sunt, fugiant in montes; et ei, qui in medio eius, discedant; et ei, qui in regionibus, ne intrent in eam.

²² Hi enim sunt ultionis dies, ut impleantur omnia, quae scripta sunt.

²³ Vae autem praegnantibus et nutrientibus illis diebus! Erit enim pressura magna super terram et ira populo huic,

²⁴ et cadent ore gladii et captiui ducentur in omnes gentes, et Ierosolyma calcabitur a gentibus, donec impleantur tempora nationum.

²⁵ Erunt signa in sole et luna et stellis, et super terram pressura gentium prae confusione sonitus maris et fluctuum,

²⁶ arescentibus hominibus prae timore et exspectatione eorum, quae superuenient orbi, nam uirtutes caelorum mouebuntur.

²⁷ Tunc uidebunt Filium hominis uenientem in nube cum potestate et gloria magna.

²⁸ His autem fieri incipientibus, reclinate uos et leuate capita uestra, quoniam appropinquat redemptio uestra’.

²⁹ Dixit illis collationem: ‘Videte ficulneam et omnes arbores:

³⁰ cum iam germinauerint, aspicientes uosmet scitis aestatem iam prope esse.

³¹ Ita et uos, cum uideritis haec fieri, scitote prope esse regnum Dei.

³² Amen dico uobis: Non praeteribit generatio haec, donec omnia fiant.

³³ Caelum et terra transibunt, uerba autem mea non transibunt.

³⁴ Attendite autem uobis, ne forte grauentur corda uestra in crapula et ebrietate et curis huius uitae, et superueniat in uos repentinus dies ille.

³⁵ Tamquam laqueus enim superueniet in omnes, qui sedent super faciem omnis terrae.

³⁶ Vigilate itaque omni tempore precantes, ut possitis fugere haec omnia, quae futura sunt, et consistere ante Filium hominis’.

³⁷ Erat autem interdiu docens in templo, noctu uero exiens morabatur in monte, qui uocatur Oliuarum.

³⁸ Omnis populus manicabat ad eum in templo, ut audiret eum.

Scripsit fr.Benedictus Huculak OFM - 02/03/2020

---