XXIII. Cum surrexisset omnis multitudo eorum, duxerunt eum ad Pilatum.

² Coeperunt autem accusare eum dicentes: ‘Hunc inuenimus subuertentem gentem nostram et prohibentem tributa dare Caesari et dicentem se Vnctum, regem esse’.

³ Pilatus autem interrogauit eum dicens: ‘Tune es rex Iudaeorum?’. Qui respondens ei dixit : ‘Tu dicis’.

⁴ Dixit autem Pilatus ad pontifices et turbas: ‘Nihil causae inuenio in hoc homine’.

⁵ Qui inualescebant dicentes: ‘Commouet populum docens per uniuersam Iudaeam et, cum coepisset a Galilaea, usque huc!’.

⁶ Pilatus autem, cum audiuisset, interrogauit, num homo [ille] Galilaeus esset;

⁷ et ut cognouit eum ex Herodis potestate esse, remisit eum ad Herodem, qui ipse quoque erat Ierosolymae diebus illis.

⁸ Herodes autem, uiso Iesu, ualde gauisus est. Ex multo enim tempore erat cupiens eum, ideo quod audiuerat de illo et sperabat se uisurum esse aliquod signum ab eo fieri.

⁹ Interrogabat autem illum multis sermonibus; sed ille nihil ei respondit.

¹⁰ Steterant etiam pontifices et scribae uehementer accusantes eum.

¹¹ Spreuit autem eum Herodes cum exercitu suo et illusit, et indutum ueste candida remisit ad Pilatum.

¹² Facti sunt autem amici inter se Herodes et Pilatus illo die, nam antea in inimicitia fuerant ad alterutrum.

¹³ Pilatus autem, conuocatis pontificibus et magistratibus et populo,

¹⁴ dixit ad illos: ‘Adduxistis mihi hunc hominem quasi auertentem populum, et ecce ego coram uobis, cum diiudicauissem, nullam causam inueni in homine isto ex eis, de quibus eum accusatis;

¹⁵ sed neque Herodes: remisit enim eum ad nos. Ecce nihil dignum morte actum est ab eo.

¹⁶ Ergo correptum eum dimittam’.

^{(17) 18} Exclamauit autem uniuersa turba dicens: ‘Tolle hunc et dimitte nobis Barabbam!’.

¹⁹ Qui propter seditionem quandam factam in ciuitate et homicidium erat missus in carcerem.

²⁰ Iterum autem Pilatus locutus est ad illos uolens dimittere Iesum,

²¹ sed illi exclamabant dicentes: ‘Crucifigito, crucifigito eum!’.

²² Ille autem tertium dixit ad eos: ‘Quid enim mali fecit iste? Nullam causam mortis inuenio in eo; ergo correptum dimittam eum’.

²³ Illi tamen instabant uocibus magnis postulantes, ut crucifigeretur, et inualescebant uoces eorum.

²⁴ Pilatus adiudicauit fieri petitionem eorum.

²⁵ Dimisit autem eum, quem petebant – qui propter seditionem et homicidium missus erat in carcerem –, Iesum uero tradidit uoluntati eorum.

²⁶ Cum abducerent eum, apprehenderunt Simonem quendam Cyrenaeum uenientem de campo et imposuerunt ei crucem, quam portaret post Iesum.

²⁷ Sequebatur autem eum multa turba populi et mulierum, quae plangebant et lamentabant eum.

²⁸ Conuersus autem ad eas dixit Iesus: ‘Filiae Ierusalem, nolite flere super me, sed super uosmet flete et super filios uestros,

²⁹ quoniam ecce uenient dies, quibus dicent: ‹Beatae steriles et uentres, qui non genuerunt, et ubera, quae non lactauerunt!›.

³⁰ Tunc incipient dicere montibus: ‹Cadite super nos!›, et collibus: ‹Operite nos!›,

³¹ quia si in uiridi ligno haec faciunt, in arido quid fiet?’.

³² Ducebantur autem alii quoque duo nequam cum eo, ut interficerentur.

³³ Cum uenerunt in locum, qui uocatur Caluaria, ibi crucifixerunt eum et latrones, unum a dextris et alterum a sinistris.

³⁴ Iesus autem dicebat: ‘Pater, dimitte illis, qui nesciunt id, quod faciunt’. Diuidentes uero uestimenta eius miserunt sortes.

³⁵ Stabat populus exspectans. Deridebant eum etiam principes dicentes: ‘Alios saluauit; seipsum saluet, si hic est Christus, Dei electus!’.

³⁶ Illuserunt autem ei milites quoque accedentes, acetum offerentes illi

³⁷ et dicentes: ‘Si tu es rex Iudaeorum, salua te ipsum!’.

³⁸ Erat autem et superscriptio super eum: ‘Hic est rex Iudaeorum’.

³⁹ Vnus autem e latronibus, qui pendebant, exsecrabatur eum dicens: ‘Nonne tu es Christus? Salua teipsum et nos!’.

⁴⁰ Respondens autem alter dixit increpans illum: ‘Ne tu quidem times Deum, quod in eodem iudicio es?

⁴¹ Nos quidem iuste [patimur], nam digna factis recipimus! Hic uero nihil mali gessit’.

⁴² Dicebat: ‘Iesu, memento mei, cum ueneris in regnum tuum’.

⁴³ Dixit illi: ‘Amen dico tibi: Hodie mecum eris in paradiso’.

⁴⁴ Erat iam fere hora sexta, et tenebrae factae sunt in uniuersa terra usque ad horam nonam,

⁴⁵ et obscuratus est sol, et uelum templi scissum est medium.

⁴⁶ Clamauit uoce magna Iesus et dixit: ‘Pater, in manus tuas commendo spiritum meum’; et hoc dicto exspirauit.

⁴⁷ Cum autem uidisset centurio id, quod factum erat, glorificauit Deum dicens: ‘Vere hic homo iustus erat!’.

⁴⁸ Omnis turba eorum, qui simul aderant ad spectaculum istud, cum uidissent ea, quae facta erant, percutientes pectora sua reuertebantur.

⁴⁹ Stabant autem omnes noti eius a longe, etiam mulieres, quae secutae erant eum e Galilaea, aspicientes haec.

⁵⁰ Ecce uir nomine Ioseph, qui erat consiliarius, uir bonus et iustus

⁵¹ – hic non consenserat cum consilio et actibus eorum –, Arimathaeâ ciuitate Iudaeorum, qui exspectabat regnum Dei.

⁵² Hic, cum accessisset ad Pilatum, petiuit corpus Iesu

⁵³ et depositum inuoluit linteo et posuit eum in monumento exciso, ubi nondum quisquam positus erat.

⁵⁴ Dies erat Praeparationis, et illucescebat sabbatum.

⁵⁵ Subsecutae autem mulieres, quae cum illo uenerant e Galilaea, uiderunt monumentum et quemadmodum positum esset corpus eius.

⁵⁶ Reuersae autem parauerunt aromata et unguenta. Sabbato quidem siluerunt secundum mandatum,

Scripsit fr.Benedictus Huculak OFM - 08/05/2020

---