|
|
NUNTII
De Italicorum comitiorum exitu
De Italicorum comitiorum exitu
Solis et Lunae diebus populus Italiae suffragia tulit, maiorem
consensum parti dexterae attribuens et parti laevae, quae per
biennium magna cum difficultate rem publicam rexerat, facultatem
diutius gubernandi denegans.
Paulo ante comitia factiones politicae quae inter se per tria
lustra certaverant nomina et rationes commutaverunt: Euge Italia!
cum Foedere Nationali coniuncta constituit Factionem Populi
Libertatis, Factio Bellidis cum Laevae Democraticis novam Partem
Democraticam creaverunt, factiones denique minores communisticae
et virides in "Sinistra et Iride" una se coniunxerunt.
Primae factioni Silvius Berlusconi, alteri Waltherius Veltroni,
tertiae Faustus Bertinotti praefuerunt. Nomina ducesque
servaverunt Foedus Nordicum, quod Humbertus Bossi, et Virtutum
Italia, quam Antonius Di Pietro olim severissimus iudex
conducunt, prior dexterae, alter laevae partis sociatum.
Silvius Berlusconi cum Foedere Nordico Waltherium Veltroni
profligavit, sibi sellam ministri primarii conquirens: qui,
ditissimus vir et trium retium televisificarum plurimarumque
officinarum dominus, iam bis Italiam rexerat. Romanus Prodi,
usque ad hunc diem rector supremus, praesidentatum Partis
Democraticae reliquit neque se in Italia ultro rei publicae
studere velle annuntiavit.
Scripsit
Herimannus Novocomensis - 17/04/2008 20h42
.
.
![](honor.gif)
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|