|
|
NUNTII
IURISPERITA GRATIAE SINENSIUM IMPROBE MOVENDAE ACCUSATURParliamentarii Britannici de ea moniti
Londinii: Die Iovis XIII mensis Ianuarii, Occultum Rerum Domesticarum Praesidium, quod omnibus gentibus haud occulta voce “MI5” notum est, id quod perraro fit, Parliamentarios Britannicos per Praelocutorem suum monuit: quandam mulierem, cui nomen Christina Ching Kui Lee est, a Partibus Sinensibus Communistis allecta, ut rebus civilibus Regni Britanniarum interveniret et amicitiis commercioque cum illis fovendis rem publicam Sinensem in gratiam illorum tecto reduceret.
Ea mulier, nunc LIX annum aetatis agens, Britanniam XXII annos nata invecta mox in eam civitatem venit. Operis iurisprudentiae datis, cum cognitrix facta est (sicilicet, ad eam ordinem iurisperitorum, qui “solicitors” Anglice, “cognitores” Latine vocantur, admissa est) tum proprium consortium legale sedibus et Londinii et Birminghamiae instructum condidit. Exinde quaedam munera, quibus viam sibi ad rem publicam muniret, nonnulla adepta est: officio iurisconsultae propriae primum Legationis Sinensis Londinii; deinde Transmarinae Sedis Sinsenis; postremo Concilii Operis Principiorum Consociatorum, quod Anglice vocatur, “United Front Work Department,” functa est.
De hoc Concilio Sinensi Praesidium “MI5” Parlimentarios et monuit: se existimare, id una cum Christina Lee operam dedisse, ut res publica Britannica in eum statum redigeretur, quo eis hominibus, qui res gesta Partium Sinensium Communisticarum culparent, facilius opponeretur; atque eis rebus, ad quas eaedem Partes intenderent, libentius faveretur. Christinam Lee ipsam alianae nationis adiutricem versatam fuisse in multam pecuniam largiendo eis, qui honores rei publicae Britannicae vel praestarent vel peterent.
Enim nunc comperta est corona hominum, qui negotium rei publicae agebant, XV annos iam interfussie. Primum, multa ab anno MMV Partes Laboris donabat pecunia, quae praecipue a quodam Barra Gardiner Parliamentario in scribis conducendis adhibita est: vero, huic filius eius per aliquod tempus scriba salutationum pro merce inserviebat. Deinde, anno MMX, ubi David Cameron moderator Partium Conservantium ac primarius minister erat, legationi cuidam, per quam de negotio mercaturaque ageretur, in Sinam missae interfuit. Tum anno MMXIII, modicam pecuniam Partibus Liberalibus dedit. Tum anno MMIXX, a Theresa May tunc Partium Conservantium moderatrice ac primaria minstra quandam palmam accepit, quod inter Britannos et Serices in Britannia peregrinantes concordiae amicitiaeque fovere diligenter laboravisset, qua palma nunc repente exuta est.
His iam patefactis, Pritia Patel rerum domesticarum ministra Parliamentarios certiores fecit: tametsi sibi curae esse, quod mulier pro Partibus Sinsensibus Communisticis rei publicae Britannicae consulto intervenisset, tamen eam minora fecisse, quam quae diem dicendum meruisset. Nihilo autem minus, se oportuisse Conparliamentarios monere, eam animos illis improbe afficere molitam fuisse.
De criminibus in Christinam Lee intentis rogatus, quidam interpres Legationis Sinensis Londinii negavit ullum opus Sericibus esse, gratiam apud Britannicos Parliamentarios merce petere; immo, Serices morem gentium colentes numquam rebus domesticis cuiusvis populi alieni intervenire.
At de his rebus nullum profecto responsum a Christina Lee ipsa diurnariis crebro rogantibus adhuc datum est.
Scripsit
Rufus Britannicus - 15/01/2022 15h15
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|