UNCTAD PRAEVIDET NOVUM QUASI-NUMMUM INTERNATIONALEM

Estne dolarium commutandum auro?

Dolarium decidit valde die Martis erga alias monetas principales mundi propter timorem negotiatorum, quod nummus US-Americanus commutandus sit auro aliisque valoribus in mercatura internationali.

Talem possibilitatem ad pensitandum politicis negotiatoribusque praebuit die Lunae Conferentia Nationum Unitarum Mercatui Evolutionique Oeconomicae Promovendis (UNCTAD) in annuali aestimatione condicionis oeconomiae internationalis. Tali nuntio nixa pretia auri primum a mense Martio huius anni creverunt die Martis mane ultra limen mille dolariorum.

Adhuc analytici mercaturae cogitabant dolarium tutum esse foreque ut moneta negotiorum internatiolium, in qua scilicet computandae sunt omnes fere transactiones inter variorum gentium negotiatores organisationesque globales. Harum autem nonnullae, ut Fundus Internationalis Monetalis (IMF) iam nunc adhibent in sui calculationibus loco dolarii valores quasdam ficticias.

Die Martis dolarium USA decidit gradu 0,95 centesimae erga fiscellam sex aliorum principalium nummorum mundi, qui sunt: euro, libra Britannica, dolarium Canadense et Australianum, ien Iaponicus, francus Helvetorum.