|
|
Narrationes variae
seu fabulae Latinae hodiernae
a scriptoribus Ephemeridis creatae
|
|
NATURAM IN MELIUS MUTEMUS!
 Naturam in melius
mutemus!
Olim, matutino tempore, dum cana nix
terram gelidam obruit Populus et Abies …
Populus: Salve, mi care Abies…
Abies: Suspensus esse videris.
Populus: Nolim te perturbare
… hodie vultus tuus pallet.
Abies: Tuus quoque.
Populus: Verumne dicis?
Abies: Numquam falsum dicere
soleo; non ignoras.
Populus: Ecquid triste evenit?
Anxius sum.
Abies: Sine dubio est qui culpa
non vacat.
Populus: Cur de alicuius culpa
dicis?
Abies: Omnes arbores tam
consciae sunt.
Populus: Cuius rei, quaeso,
consciae?
Abies: Hodie mane ego quoque
conscia fui.
Populus: Aperte velim dicas,
Abies.
Abies: A quadam avicula, hac
vagante ac fame laborante, certior facta sum humanorum culpa
naturam penitus deleri, aërem inquinari, pisces quoque laborare.
Populus: Iocose dixistine?
Abies: Utinam iocose dixissem!
Verum autem id, de quo locuta sum, est!
Populus: Fieri non potest ut
humani aliquid faciant quod sibi ipsis noceat; omnibus constat
sine nobis vitam non esse.
Abies: Huius veritatis eos
conscios esse putabam.
Populus: Innumerabiles libri
scripti sunt, qui humanos hortantur ut naturam colant et ament.
Abies: Surdis auribus
scriptores cecinerunt!
Populus: Mi care amice, odium
in humanos nuper concepi.
Abies: Iam antea, hodie mane
dicam, odium concepi.
Populus: Aegre spiritum duco.
Abies: Hoc idem sentio, amice.
Populus: Vitae finis adest.
Abies: Vale, Popule!
Populus: Vale atque vale,
Abies! Illic nos futuros esse spero, ubi humani absint!
Scripsit Dominicus Caveosanus - 26/06/2012 21h10
|
