Ioachimus Oehlke, director quondam Germanici instituti entomologici, vesparum est peritissimus.

SPIEGEL ONLINE: Vespae his annis suntne pugnaciores quam prius?

Oehlke: Immigrant quidem novae species vesparum e regionibus mediterraneis, sed species, quae hominibus sunt molestae, ex longo tempore sunt eaedem.

SPIEGEL ONLINE: Suntne mores vesparum mutati? Non recordor eas prius carnes et pisces cupivisse.

Oehlke: Non, mos vesparum comedendi non est mutatus. Vespae unâ ex parte comedunt dulcia, ut energiam recipiant. Alterâ ex parte vespae opifices circumvolantes pro larvis quaerunt etiam nutrimenta proteinis abundantia. Eae vespae, quae nobis hominibus sunt molestae, sunt species sociales, id est eaedem vivunt populatim et singulas larvas cibant. Itaque proteinis indigentes advolant ad caseum aut carnem.

SPIEGEL ONLINE: Ergo eo tempore, quo proles cibatur, fames carnis augetur?

Oehlke: Augetur. Pleraeque species more sociali viventium quotannis habent duas generationes, interdum etiam tertiam valde seram. Mensis Iulius est is mensis aestivus, quo vespae rarissime apparent. At nunc cibatur generatio secunda.

SPIEGEL ONLINE: Quo usque tandem?

Oehlke: Per duas aut tres septimanas, hoc pendet a singulis condicionibus. Medio mense Septembri invasio vesparum solet esse finita.

SPIEGEL ONLINE: Possuntne vespae cibis insidentes morbos transferre?

Oehlke: Theoretice quidem hoc fieri potest. Species frequentissimae insident etiam merdae atque stercori – hoc non faciunt, ut illa devorent, sed ut capiant alia insecta.

SPIEGEL ONLINE: Taediosum est. Quomodo vespae arceri possunt a cibis? Oehlke: Nidi vesparum saepe quidem difficiles sunt aditu, sed si accedi possunt, nidi possunt auferri. Ad hoc faciendum horâ diei maximi frigoris, mâne versus horam quartam, nidum cucullo aut vasi hermeticê concludito, deinde aptum venenum insecticidale infundito aut fervefacito, ut vespae necentur. Sed optimum est hanc rem remittere ad specialistam.

SPIEGEL ONLINE: Ergo etiam tu quamvis vesparum perscrutator non recusas, ne vespae necentur?

Oehlke: Verbis efferendum est multas exstare species vesparum, perpaucas autem hominibus periculosas. Quae effectu humani cultus civilis foventur ideoque earum proles valde propagatur. Nos multos cibos relinquimus, reliquias ciborum abiciuntur in cumulum composturae et alios in locos – vespae autem fere omnia devorant. Itaque licet nidos earum auferre destruendos.

SPIEGEL ONLINE: Si vespae in horto aut in viridario impetum faciunt in aliquem, tempus non iam est quaerere nidum vesparum. Estne consentaneum, ut construatur decipula – aqua saccharina, quae infunditur lagoenae?

Oehlke: Hoc fieri potest, sed non sufficiet ad vespas efficaciter impugnandas, nam perpaucae vespae incident in lagoenam.

SPIEGEL ONLINE: Prodestne partem citri quartam, cui infixa sunt caryophylla, mensae imponere?

Oehlke: Quo fragrantia forti exorta vespae fortasse tam male sciunt volatum dirigere, ut removeantur. At num hoc effectum certum habeat, nescio.

SPIEGEL ONLINE: Quid mihi agendum est, si a vespis circumvolitor?

Oehlke: Ne eas manibus petas, alioquin iratae sociis arcessitis una impetum in te facient.

SPIEGEL ONLINE: Si vespas advolitantes manu leniter amoveo – num eae tantulam motionem iam esse impetum hostilem putant?

Oehlke: Plerique homines vespis advolitantibus excitatissime illas manu petunt. At si vespas caute, motu quieto semoveris, nihil mali tibi accidet.

SPIEGEL ONLINE: Nisi vespas petivero, certissime me non punget?

Oehlke: Fieri potest, ut vespa insideat cuti hominis, cuius membra convellantur; quam motionem corporis humani vespa cum putet sibi esse periculosam, hominem pungit. Equidem sino vespas cuti meae insidere, hoc non curo. Apud nos vespae minus sunt aggressivae quam in aliis mundi regionibus. In Africa atque America meridionali iam expertus sum tota examina vesparum impetum facere in me. SPIEGEL ONLINE: Si ita est, nobis feliciter accidit! Possumne vespas nostrae patriae sine periculo manu necare?

Oehlke: Potes, sed praestat eas necare muscario. Quo potes illas etiam fugare. Maxime cavendum est, ne illas allicias. Si in horto sedea, hoc anni tempore cibi bene obtegendi sunt.

SPIEGEL ONLINE: Suntne vespae aliqua ratione utiles?

Oehlke: Vespae alia insecta decimant, praesertim varias species muscarum – et aphides.

==============

=============