Praecocis agnitionis morbi Alzheimeriani

... indicia comperta sunt

Praesentia decem phospholipidorum in sanguine indicium est morbi Alzheimeriani duos tresve annos antequam cognitionis defectus manifestum fiat: hoc compertum est post experimentum quo observati sunt plus quingenti senes, morbo illo ab initio minime affecti; unde morbus ante tempus praevideri poterit, facultas et praeveniendi et medendi increscet.

Sanguinis examinatione ut decem phospholipidorum abundantia cognoscatur poterit medicus an homo mente sanus sequentibus duobus tribusve annis dementia passurus sit, exiguis dubiis remenatibus. Hoc nuntiat in actis "Nature Medicine" Marcus Mapstone, studiosus universitatis Roffae (Rochester) in re publica Neoeboracensi, cum aliis medicis Civitatis Americae Unitarum.

Morbo Alzheimeriano nunc laborant CCCL centena millia hominum in toto orbe terrarum, quorum numerus increscente vitae spe anno bismillesimo et quinquagesimo saltem triplex factum iri putatur. Nulla est ad tempus medela quae morbi cursum mutet, praeterea quod nullum notum est praecox signum: more solito tum memoriae lapsus et cognitionis deminutio observantur, cum iam satis gravis est aegrotatio. Si autem indicia biologica morbi ante tempus inventa erunt, medicamenta nova excogitari poterunt. Hodie nonnullae methodi praecocis agnitionis notae sunt magni pretii et hominibus laboriosae, sicut examinatio liquaminis cerebrospinalis ad proteina amylo similia "beta" et "tau" appellata requirenda aut tomographia positronibus emissis (PET), qua signa inflammationis vel globi proteinorum amylo similia aspiciuntur, signa huius morbi certa more solito post mortem reperta.

Cum aliae materiae unde morbus praevideatur nimie dubios exitus praebeant, post hoc experimentum, quo DXXV homines saltem septuagenarii diu observati sunt, decem materiae pingues phosphoro praeditae compertae sunt, quae integritatem aut dissolutionem involucri neuronum ita patefaciant, ut mentis levis dementia futura ante duos tresve annos agnoscatur. Aliis experimentis tamen opus est, donec talis examinatio in senibus perfici possit.

ex actis interetialibus Le Scienze convertens

Scripsit Herimannus Novocomensis - 17/03/2014 22h55

DE ARTE LOQUENDI CUM SURDIS

De cancro vitabili

De ventris locatione gravis quaestio

Qui fit ut nonnulli, corde aut cerebro...

Prosperitas improvisa

.

.

Subnotationes fient
ante finem Septembris.