De Carolo Gesualdo (n. 1566 - m. 8 Sept. 1613)

Quadringentesimus annus modo expletus est, ex quo Carolus Gesualdo, praeclarus musicae artifex, mortuus est.

Venosae anno 1566 natus erat e parentibus, qui cum aliis nobilioribus familiis coniuncti erat. Hieronyma, huius viri mater, soror erat Caroli Borromaei, archiepiscopi Mediolanensis et cardinalis. Iam adulescens a musica est Carolus Gesualdo tam adlectus, ut, cum vigesimum annum nondum attigerat, quosdam libros in lucem protulerit musicales. Anno 1586 Mariam d'Avalos, pulcherrimam feminam bis viduam et a. 1560 e familia Hispanicae originis nobilissima natam, uxorem duxit Gesualdo. Quas nuptias brevi laetiores reddidit infantulus, nomine Emmanuel. Splendido autem in palatio Neapolitano, ubi domicilium coniuges elegerant, die 16° mensis Oct. a. 1590 nefandum accidit facinus.

Carolus, cui rumores quidam pervenerant de illicita uxorem inter et Fabricium Carafa, nobilem iuvenem ac venustum, consuetudine, Mariae dixerat se cum amicis duos dies venationibus dedicaturum. Sed cum tribus servis prope domicilium exspectavit ut Carafa in palatium ingrederetur. Dum uterque Veneri libat, servi et Carolus in thalamum irrumpunt: Maria iugulatur, plumbeis glandibus Fabricius confoditur. Carolus, cui non deerant auxiliatores, per aliquot annos clanculum vixit, antequam anno 1594 Eleonoram, e Ferrariensi familia 'Este' natam, duceret uxorem. Quae puerum peperit, nomine Alfonsum; hic autem patri, adaeque Emmanuel, non supervixit. Carolus, etsi his calamitatibus prostratus, musicam artem colere haud destitit; et quoniam facili libentique ingenio musicali praeditus erat, matricalia carmina componere perrexit aliaque musicorum genera modorum. Per saecula nomen Caroli Gesualdo mansit paene ignotum, fortasse obscuratum ab illo duplici homicidio.

Sed abhinc nonnulla decennia multi artis musicae peritiores viri doctrinam Venusini compositoris investigare coeperunt omnesque Carolum Gesualdo laudant (quod legerim) praesertim ut antesignanum illius generis musicalis, quod 'multisonus concentus' dicitur seu 'moderna ars polyphonica'.

Scripsit Victorius Ciarrocchi