Annus
2 0 1 3


Odium Iudaeorum in Hungaria ingravescit

Odium Iudaeorum in Hungaria ingravescit

Coram magna vigilum publicorum multitudine Budapestini factio “Meliorum”, quae lingua Hungarorum Jobbik appellatur, „Conventui Iudaeorum Totius Orbis“ reclamavit, qui in capite Hungarorum agetur. Se eorum recordari velle, qui a communistis zionistisque oppressi essent. Cuius factionis asseclae cum vexilla ad fascisticum regimen spectantia vibrarent, multitudo clamitabat „Iudaei foras!“ et „Hungaria nostra est“.

Gabor Vona, qui factioni praeest, poposcit, ut ii, qui non solum Hungari, sed etiam cives Israeliani essent, a magistratu se abdicarent. Praeterea Iudaeos caedibus Hungarorum, quas commisissent, veniam petere debere. Denique se Victorem Orbán delaturum, ut qui ministrum rerum internarum monuisset, ut reclamationes ab iudicibus probatas interdiceret.

Marton Gyöngyösi, illius factionis legatus (quem in imagine superiore aspicis), regimini Victoris Orbán „nimiam Zionistarum oboedientiam“ obiecit, cum etiam pueruli secundum leges rationesque Zionistarum educarentur. Gyöngyösi iam antea poposcerat, ut index fieret omnium Iudaeorum qui in re publica versantur, quod securitati nationali periculo essent.

Mensibus superioribus saepius fiebat, ut similia acciderent. Odio Iudaeorum ingravescente Iudaei ipsam urbem Budapestinum elegerunt ad conventum agendum, ut, quantum cum Iudaeis Hungaris essent coniuncti, demonstraretur.

Scripsit Volfgangus Austriacus



Retro ad:

Novissima editio
Summum paginae