De migrantibus exhaustis ...

“Amnestia inter gentes”(Amnesty International) nuper renuntiavit migrantes malo usu opprimi apud societates exstructorias in operibus maximi pretii ad aedificandas collocationes certaminis pancosmii pedilusorii posteri anni MMXXII in philarchia Qatariana. Sub oculis foederationis omnium gentium pedilusoriae (Fifa) publicaeque administrationis inertis vel etiam sociae, conductores rei exstructoriae adeo abutuntur migrantibus ut eorum opera ergastulo nempe comparetur.

Ab eadem sodalitate relatum est inspectiones prorsus deesse ut praecepta observentur quae operarios defendant securosque reddant operae locos. Huc accedit quod salaria non solvantur, domiciliorum status infandus; non potest autem praetermitti quin “ratio sponsorum” obstet ne operarii exeant ab illa natione vel operam mutent nisi dominus iis licentiam det.

Narratio quae sequitur exemplum est horum opificum inhumanae condicionis; quidam rector societatis aedificatoriae homines “animalia” vocat; qui in opere sunt tota hebdomade duodecim horas singulis diebus, etiam mensibus calidioribus. Qui in patriam redire velint subscribere coguntur falso se accepisse salaria ut sibi syngraphus reddatur atque exire e finibus liceat. Domicilia purgamentis circumdantur ac fossis apertis cum excrementis aqua bibenda carente. In nosocomia in uno anno circiter mille vulnerati accepti sunt ossibus fractis cum e contabulationibus concidissent: decem centesimae partes eorum infirmi manserunt, sed partim non superfuere; plurimi cordis angore periere.

Periculum est ne certamen pedilusorium omnium gentium cruciatus fiat centenis milibus virorum tamquam servi essent antiquae Aegypti.

Scripsit Lydia Ariminensis