Ictus Americanorum Syris imminet

Investigationes eorum, qui a Nationibus Unitis in Syriam missi erant, finitae sunt. Quarum eventa, ut dicunt, ad Id. Sept. in medium proferentur. Tamen Americani iam nunc credunt de rebus Syriacis non esse dubitandum: Ioannes Kerry, minister rerum externarum, dixit ex argumentis indiciisque, quae ad manum sibi essent, apparere sectatores praesidis Assad cives suos a.d.XII. Sept. armis chemicis interfecisse. Baracus Obama, praeses Americanus, ultimo consilio adhuc non capto in oratione ad res Syriacas habita, quatenus Americani processuri sint, civitatem certiorem fecit. Obama iam Veneris die dixerat se de ictu terminato cogitare peditibus omissis. “Nolumus mulieres puerosque“, inquit, „et cives insontes tam atrociter toxico gasali perire.“ Neminem «maiore belli taedio» affectum esse quam se ipsum, sed falsum se signum daturum fuisse, si nihil ageret. Ictus Americanorum iam brevi exspectatur, etiam a Syris, qui ad ultionem se paratos esse affirmaverunt. Russi, qui consociatissimi Syrorum habentur, dicta Obamae vehementer reprehenderunt. Cuius minas esse repudiandas. Vladimirus Putin, cum vera posceret argumenta sceleris facti, „nemo“, inquit, „cui mens sana est, credat exercitum Syrum eo ipso die talibus armis uti, quo investigatores Nationum Unitarum in Syriam veniant.“ Rem esse prorsus insanam, quod Americani exercitum Syrum huius sceleris incusarent. Immo sibi esse persuasum id a seditiosis esse commissum, ut bellum, quod in Syria gereretur, in alias quoque civitates proferretur.

Scripsit Volfgangus Austriacus