De bello civili Aegyptiaco

Bellum intestinum Aegyptum incendit postquam praeses Morsi ab imperio remotus est. “Die Veneris Irae” caedes ingens in proeliis inter biocolytas et fautores prioris regiminis facta est apud complura oppida, Cairi et Alexandriae etiam ab helicopteris arma in multitudinem displosa sunt: ab auctoritatibus militum dominantium mortui a die Mercurii circiter mille computati sunt, a Fratribus Muslimis saltem quattuor milia. Meschita Al Imam in platea Ramses Cairi mortuorum corporum repositorium effecta est et nosocomium , ubi medici voluntarii remediis carent neque ulla sectio chirurgica neque sanguinis immissio fieri potest, potius locus inferorum quam valetudinarium.  

Eadem platea Ramses his diebus locus proeliorum praecipuus fuit quo reclamantes convenerunt quorum pars, mille fere, in alteram meschitam Al Fatah hic sitam confugit. Die Saturni prima hora post meridiem extrema pacis condicio exiit: quam ob rem impetus a biocolytis et militibus factus est centumque acerrimi adversantes discedere coacti sunt gasio lacrimatorio intus iniecto. Ante meridiem negotiis pactis inter Fratres Muslimos et militares magna pars occupantium inter quos decem feminae tranquille egressi erant.

Novissimo die mille fautores praesidis Morsi comprehensi sunt, CCL Fratres Muslimi homicidii et tromocratiae accusantur. Interea Minister Primarius ad tempus Hazel El- Beblawi legem tulit ut hic grex dissolveretur: non sibi posse reconciliari eos quibus sint manus cruore respersas.

Scripsit Lydia Ariminensis