Panamenses navem Coreanam transitu prohibent

Magistratus Panamenses navem onerariam Coreanam, in qua arma inventa erant, transitu prohibuerunt. Sub onere sacchari Cubani partes missilium latebant, quae in Coream Septentrionalem portarentur. Cum nautae actioni Panamensium acerrime resisterent, praefectus navis mortem paene sib conscivit.

Moderatores Coraeae Septentrionalis interim poposcerunt, ut navis sua statim mitteretur. Esse arma obsoleta, quae in terra sua restituerentur, deinde rursus in Cubam portarentur. Magistratus Panamenses “temere egisse”, cum navem retinerent; nautas, qui comprehensi essent, statim mittendos esse. Iam antea Cubani dixerunt arma, quae in Unione Sovietica facta essent, ad nullam aliam rem nisi ad suam ipsorum defensionem pertinere; quae, cum in Corea restituta essent, ad se reportatum iri.

Re patefacta Panamenses ab Nationibus Unitis petiverunt, ut quaererent, numquid contra legem actum esset, qua cavetur, ne quae arma in Coream Septentrionalem transportentur.

Scripsit Volfgangus Austriacus