Civitates Latinoamericanae Eduardo Snowden asylum offerunt

Eduardus Snowden, qui secreta subauscultata officii NSA, cuius pars ipse fuerat, in publicum protulit, ab Americanis proditionis accusatus iam plus unam septimanam Moscoviae, in aeroportu Sheremetievensi commorari dicitur. Snowden num in Civitates Unitas reversurus sit, incertum est, quia de aequitate iudicii dubitatur. Accedit, ut magistratus Americani syngrapham eius rescisserint.

Interim Snowden a nonnullis civitatibus asylum petivit. Quod cum plurimae earum renuissent, sive Americanis morem gesserunt sive aliam causam interposuerunt, qua sibi liceret eum a terra sua prohibere, tamen tres civitates Latinoamericanae promptae sunt ad asylum praebendum : Nicolaus Maduro, praeses Venetiolae, « humanitatis causa », inquit, « asylum ei offerre constitui. » Eduardum Snowden de iuribus humanis bene meritum esse. Similia et a praeside Nicaraguae, Daniele Ortega, audiebantur, qui dixit se illum « summo cum gaudio » in terra sua recepturum. Etiam Evo Morales, praeses Boliviae, Eduardo Snowden asylum praebere vult. Morales nonnullis civitatibus Europaeis vehementer  irascitur, quod se Moscovia in patriam redeuntem prohibuerint, ne super fines suos volaret. Quod Americanis urgentibus factum esse se pro certo habere: non esse dubium, quin Americani crediderint  se ipsum hostem suum in aeroplano secum ducere.

Scripsit Volfgangus Austriacus