Praeses Morsi ab imperio remotus est

Non in Aegypto cartha rei publicae constitutiva iam viget: praesidi Morsi imperium ademptum est simulque rector tribunalis supremi constitutionis Adlis Mansour ad tempus ut praesidens creatus est ut rei publicae legibus in intervallo provideat. Quae ab exercitus duce Abdel Fattah al-Sissi nuntiata sunt, postquam Mohametus Morsi certior factus est se non esse dehinc rei publicae principem cum colloquia cum militibus spem pactionis fefellissent. Sunt qui putent eum in custodia domiciliari detentum esse, a nonnullis horis, postquam ipse recusavit ne se a munere abdicaret. Eadem sors fertur primoribus Fratrum Islamicorum contigisse qui in exilium ire vetiti sunt: quae factio politica, cui pertinet Morsi, se cum usurpatore minime operam sociaturos esse proclamaverunt.

In foro Tharir nuntius acceptus est magno clamore elato ubi ignes missiles displosi sunt. “Populus exercitusque una manus sunt”: quod ab adversariis praesidentis Morsi conclamatum est. Exercitus nova comitia ante tempus praenuntiavit promisitque se daturum esse “panem, libertatem, dignitatem humanam”, “veram concordiam ”.

Auctoritates Unitarum Americae Civitatum quae pecuniam priori regimini suppeditaverunt affirmant se maxime sollicitas esse, pacem, non bellum civile exoptantes. Aegyptii inter se maxime discordes sunt. Praeses Morsi autem primus fuit populariter electus. Iterumne militum regimen redibit?

Scripsit Lydia Ariminensis