De octava victima

Post mensem mortua est Barbara De Anna, mulier Italica XL annos nata, octava victima diruptionis Cabuliae di XXIV mensis Maii factae: armati aedificia Ordinis Nationum Unitarum ubi Ordo Mundanus Migrantium (IOM) et nosocomii societatis beneficae Emergency aggressi erant pyrobolis et armis automatariis. Septem homines summatim mox interierant, Barbara, Ordinis Mundani Migrantium officiaria Florentina, in toto corpore ustionibus affecta confestim in proximum nosocomium allata est, deinde in nosocomium militare Americanum, in oppido Germanico Ramstein situm, ubi medici eam quam diligentissime curaverunt. Ob nimia cutis damna post menstruum excruciatum die XXI mensis Iunii mortem obiit.

Nuntii Talibanorum paulo post caedem perpetratam dixerunt in aedificio observatores tantum Americanos inesse, qui indagatores ab Afganorum regimine missos exercerent. Barbara De Anna operam cotidie dabat, ut auxilia egenis Cabuliae incolis afferrentur.

Praesidens rei publicae Italicae Georgius Napolitano mulierem in epistola eius familiae missa commemorat, aiens ipsam colendam esse magnanima opera et supremo sacrificio.

Scripsit Herimannus Novocomensis