Milites Austriaci e collibus Golanianis recipiuntur

Moderatores rei publicae Austriacae modo constituerunt, ut milites, qui per XXXIX annos indutias inter Syros Israelesque factas conservabant, e collibus Golanianis reciperentur. Causa fuit, quod nuperrime bellum civile in ea quoque zona geritur, quae inter Syriam Israeliamque interiecta est. Quam zonam intrare milites utriusque civitatis vetiti sunt. Hanc legem iam antea Syri seditiosi saepius neglegebant; quin etiam milites Philippiniani ab iis abducti sunt. Tamen moderatores Austriaci adhuc affirmabant se milites non recepturos, nisi forte ea lex tolleretur, qua caveretur, ne seditiosis arma darentur. Quod quin propediem fiat, tamen nemo dubitat.

Werner Faymann, cancellarius Austriacus, diurnariis dixit milites ideo receptum iri, quod mandata a Nationibus Unitis suscepta in hoc statu rerum praestare non iam possent: milites quondam in hanc regionem esse missos pacis servandae, non belli gerendi causa. Quorum militum esse observare et nuntiare, non pugnare. Sed bello civili ingravescente milites non iam tutos esse.

Sunt quidem, qui hoc regiminis consilium vehementer reprehendant, praecipue quod Nationes Unitae ante de ea re certiores non factae sint. Non est mirum, quod Ban Ki-moon, secretarius generalis, consilium Austriacorum valde doluit. Difficile quidem erit milites Austriacos, quorum officium ab omnibus probabatur, in tanto rerum discrimine novis copiis supplere.

Scripsit Volfgangus Austriacus