De Indica puella ab amicarum matribus exusta

Novus nuntius horrendus ab India de vi cotidiana contra feminas minoris aetatis pervenit. Puella undecim annorum, nomine Rinki Behera, a parvularum amicarum matribus adusta est quae voluerant eam punire quod index fuisset furti parvi momenti una cum duabus amiculis eiusdem aetatis a se facti.

Ut videtur, puellula, priore die Mercurii, se contulerat in hortum situm in pago Balinali rei publicae orientalis Orissae una cum duabus amicis ut aliqua mala Punica furaretur. Incertum est qua re, puella postea quae fuissent furti participes agricolae indicavit qui statim parentes de re edocuit. Matres, nomine Moli et Sulochana, non modo eas non reprehenderunt sed potius, parato excipolo liquoris propulsorii, reae domum adierunt. Usae tempore quo puella sola domi esset, eam retentam benzinio sparserunt et, horribile dictu, accenderunt. Cum avus advenerit, statim auxilium petivit. In nosocomium misera translata est, tamen interiit quod gravissime toto corpore usta esset.

Nullum commentarium de turpissimo scelere addere decet nisi quod et feminae feminis puerilis aetatis vim afferunt, cum plura stupra hoc tempore puellulis in India illata sint.

Scripsit Lydia Ariminensis