De impetu tromocratico in urbe capite Afghana

Ante biduum quarta hora post meridiem diruptio in media urbe Kabul facta est: verisimile est autocinetum pyrobolo dolose instructum a voluntario se interemptore ductum, cancellos deiecisse aditum praebentes aedibus Instituto Omnium Gentium pro Migratione (Iom), quod corpus cum Coetu Unitarum Nationum sociatum, ab anno 1992 migrantibus operam dat.

Statim duplex armatorum grex in aedificium irrupit, vigiles Afghani autem vim armis in re confusa atque inordinata reppulerunt. Vigil Nepalensis ac byocolita munere vacans perierunt cum nonnullis petitoribus. Uno tempore Barbara De Anna Italica, Instituti moderatrix, gravissime vulnerata est, quae tamen de impetu legationem edocere potuerat nuntio telephonico. Pyrobolo sauciata et adusta prope toto corpore, in nosocomium loci deducta est; postea in Germaniam in valetudinarium aptum ad adustos gravissime curandos translata est, sed prognosis adhuc secreta permanet.

Rei testes narraverunt proelium aliquot horas contra viros armatos satis exercitatos productum est. Decem inter quos byocolitae saltem interierunt, pariter vulnerati. Talebani per relatorem declaraverunt suum propositum esse non civiles occidere, sed Secretorum Munerum Americae (CIA) praeceptores. De qua re sunt qui dubitent: nam incursio prorsus bellica putatur fuisse praesertim quod, ante posteri anni recessum, ad milites Consociationis ex Pacto Atlantico (NATO) ut exerceant milites et byocolitas Afghanos praepositos securitati pertineat, plures quam ter centum milia hominum.

Scripsit Lydia Ariminensis