Tumultus in Suecia continuantur

Quinta nocte tumultuosa in suburbiis Stoccholmiae denuo complura autocineta incensa sunt. Iuvenes tumultuantes praeterea duas scholas et praesidium vigilum publicorum incenderunt. Siphonarii, cum flammas exstinguerent, lapidibus icti sunt; tamen nemo vulneratus esse dicitur. Octo homines comprehensi sunt.

In urbibus Sueciae iam per quinque noctes tumultuatur. Causa fuit, quod vigiles publici hominem LXIX annorum necaverunt, qui dolabra armatus in publicum prodisse dicitur.

Sequebatur, ut in Suecia disputatio orta sit de iniqua hominum condicione, cum plurimum distaret , dives aliquis esset an pauper. Cum maior civium pars fortunatissima habeatur, ii, quorum parentes quondam in Sueciam immigraverant, salutis publicae magna ex parte non participes sunt. Consilia magistratuum, quae ad immigrantes civitati adiungendos pertinent, interim a multis vehementer vituperantur.

Scripsit Volfgangus Austriacus