Rios Montt genocidii condemnatus est

Iudices Guatemalenses Ephraimum Rios Montt, dictatorem pristinum, de genocidio sceleribusque in bello commissis ad custodiam LXXX annorum condemnaverunt. Reum caedes cruciatusque aboriginum praestare, qui rebelles adiuvissent. Rios Montt annis MCMLXXXII et MCMLXXXIII, cum ea scelera committerentur, summum in Guatemala imperium obtinuit.

Cum antea ii, qui talia scelera commisissent, iudicibus internationalibus traditi essent, nunc primum factum est, ut dictator a civibus suis genocidii condemnaretur. Qui tamen dixit se innocentem esse seque minime illa scelera praestare; immo rebellibus similia obiecit. Coram diurnariis iudicium nihil dixit esse nisi spectaculum politicum.

Dictatore condemnato tumultus orti sunt, cum homines plaudentes „iustitia, iustitia“ clamitaverunt.

Scripsit Volfgangus Austriacus