De funere Margaritae Thatcher

Mercurii die Londini funus Margaritae Stramentariae (vulgo, Thatcher) factum est. Illa primus minister vel prima ministrix Reginae ab anno 1979 usque ad 1990 civitatem britannicam multis partibus instaurasse censetur animosque civium magnopere flexisse, amorem nempe atque odium in se pariter suscitasse. Tenax quidem natura eius effecit ut ab hostibus primum deinde et a fautoribus 'Ferrea illa' nuncuparetur.

Potentiam societatum articifum tum temporis maximam fregit, dominium in multa opera ad usum generalem spectantia, quae sunt v.g. res ferriviariae, domicilia pro hominibus tenuioribus aedificata et diribitoria cursualia, a re publica ad privatos transtulit, insulas Malvinas vindicavit, ter suffragiis populi gubernacula accepit. Neque enim a civibus sed a sua factione optimatum tandem expulsa est propterea quod recusabat quominus patria ad Unionem Europaeam nexibus in dies arctioribus se stringeret. Qua in re si male iudicavit, viderint expulsores. Ego tamen hoc eam culpo, quod matrimonium infantesque in utero legibus male defendit.

Pompa nobili iusta facta sunt in fano S. Pauli, deinde corpus per vias plaudentibus frequentissimas elatum.

Scripsit Thomas Crean