Num Israëles consiliatores Iranianos petiverunt?

Impetu in castra Syrorum facto Israëles incursionem suam aëream silentio praetereunt. Sed in iis castris consiliatores quoque militares et Russi et Iraniani fuisse dicuntur: quod in ephemeride quadam Iraquiana legitur. Israëles non solum castra oppugnavisse, sed etiam agmen ex iis castris profecturum, in quo arma devecta essent. Eo modo Syros missilia ad bellatores Hisbollahianos transferre voluisse, quos inimicissimos Israëlium esse constaret. Huic impetui Syri apud Nationes Unitas vehementer reclamaverunt.

Hilaria Clinton, ministra rerum exterarum Americana magistratum depositura, Russos Iraniosque monuit, ne diutius praesidem Syrorum adiuvarent. Ex nonnullis indiciis apparere Iranianos Syris plus in dies auxilii ferre. Cavendum esse, ne hoc modo bellum ipsum augeretur.

Scripsit Volfgangus Austriacus