Boreoamerica. Die II mense Octobri Donaldus Trump Praeses Foederatorum
Americae Civitatium, cum pridie ille Hopem Hicks viatricem suam viro
arreptam vulgaverit, nunc in Aedibus Albis secludetur, quia cofirmatus est,
et ipsum et Melaniam uxorem suam in morbum coronarium incidisse.
Quamvis praesidis medicus eodem die nuntiavit, praesidem uxoremque eo
tempore bene valere illumque, cum consilio sese domi contineret dum
convalesceret, muneribus continenter functurum, praeses verum tamen coactus
est ut nonullas contiones apud fautores habituras sustulerit.
Quod aegrum ei ferendum, nam eum arripuit morbus non modo unum ante mensem
quam comitia praesidi creando habebuntur, in quibus Josephus Biden sibi
summum honorem petet, sed etiam duos post dies quam disputatio televisifica
inter duos magistratus competitores habita, cuius victor, cum inter se
aemuli ira incensi vehementer contendissent, ex opinione plerorumque civium
a emistro Boreoamericano “
CBS” rogatorum, Biden habebatur.
Nec Biden competitor nec Michael Pence praeses vicarius adhuc viro infecti
sunt.
Apud medicos cum constet quo vel seniorem vel crassiorem esse aegrum, eo
molestius morbum coronarium sustinere, licet Trump sit homo aetate
provectior (LXXIV enim annos natus est) et corpore pinguior, interpres
tamen Marcus Meadows hodie dixit eum nihil morbi nisi mitia indicia adhuc
praebuisse.
Nonnulli principes gentium, apud quos et Boris Iohnson primarius Britanniae
minister (qui ipse hoc anno afflictus eodem morbo est) et Narendra Modi
primarius Indiae minister et Beniamin Netanyahu primarius Israelis minister
reperiuntur, pronuntiaverunt sese exoptare ut Trump et Melania uxor quam
celerrime ex morbo convalescant.
d.II m.Oct. a. MMXX
Scripsit Rufus Britannicus
