NOVAE CAEDES AMERICANAE

Scelera biocolytarum non cessant

Priore nocte Vasingtoniae adulescens duodeviginti annorum a vigile publico qui eum ob inspectionem retinuerat, graviter glande ignifuga percussus est posteaque in nosocomio animam efflavit. Ex nuntio biocolytarum, ille minaciter arma ignivoma extraxerat. Res animos reclamantium excitavit eo magis his diebus ira ardentes ob recentem necem Georgii Floyd gravissimumque vulnus Iacobo Blake illatum.

Nec satis est. Nuper taenia quae indignationem movit de iuvene triginta annorum cui nomen erat Daniel Prude, infirma mente, vulgata est. Ille nudus in via cursitabat in suburbio apud Novum Eboracum cum biocolytae eum represserunt; manicis iniectis, involuto capite ei os humi pressus tenuerunt donec usque prope ad mortem soffocatus est. Post septem dies ille in nosocomio obiit, quo moribundus allatus erat. Res fertur accidisse exeunte mense Martio, sed modo tantum familiares imagines divulgaverunt, qui ius obtinere volunt. Cognito scelere ingens numerus civium in vias convenerunt vehementer reclamantes adeo ut vigiles publici gasio lacrimogeno usi sint.

Mors Georgii Floyd Civitates Unitas iam inflammaverat ob crudelitatem vigilum publicorum in Afroamericanos perpetratam, sed Praeses Trump quaestionem in rem politicam vertit, quasi factio democratica seditionum causa esset, immo voluerat reclamantes, ut scelestos, reprimere decem milibus militum in loca tumultuosa missis, sed Secretarius Defensioni praepositus huic rei se opposuit.

Scripsit Lydia Ariminensis