IUS SIGNIFICATIONIS VIOLATUM

Diurnarius Libycus gravi poena damnatus est

Diurnarius Libycus Ismail Abuzreiba a Tribunali militum urbis Banghazi damnatus est quindecim custodiae annis. Auctoritates partis orientalis Libyae criminum singulas res non vulgaverunt; ex nuntiis ab instrumentis communicationis manantibus ille sons iudicatus est quod epistularum mutuum commercium habuisset cum nuntiis interdictis sub regimine ducis Khalifa Haftar.

Missi Ordinis Nationum Unitarum vehementer commoti sunt, praesertim cum gravissima damnatio leges Libyae et inter nationes ratas violaret de aequo iudicio et opinandi, scribendi et dicendi libertate. Qua re praesens liberatio diurnarii postulata est, qui iam per biennium in carcere inclusus mansit. Etiam legatus Unionis Europaeae curam et sollicitudinem expressit eodemque modo petivit ut ille statim ex custodia dimitteretur et ei libertatis ac significationis iura praestarentur. Impetus ducis Haftar adversus praesidem Al Serraj etiam diurnarios secum traxit, quorum magna pars e Cyrenaica effugit.

Scripsit Lydia Ariminensis