Quidam motus querelantium symbolum sardinarum elegit ad reclamandum adversus Matthaeum Salvini, secretarium factionis Societatis, qui priore mense Augusto munus administri rerum domesticarum deposuit. Grex ortus est a reclamantibus in LibroVultuum, qui conventum subitum Bononiam sex milium fautorum apparaverunt, immo convocatio multum profecit cum XII milia in Forum Maius se congregavissent. Quattuor inventores nomen sardinarum delegerunt, quia illi demissi pisces propinqui et crebri tacite procedunt, multitudinem adgregantes, per ironiam se opponentes iis qui in contionibus clamant et praesertim Matthaeo Salvini, squalo reputato. Ideo translatis verbis sententiolas aptas excogitaverunt: “ Regio Aemilia et Romania escam non carpit”; “Bononia non coit societatem”. Mutinae hesterno die septem milia sub Iove pluvio convenerunt ut adventu adversarii obstarent. Similiter grex Ariminum et Florentiam confluet. Iam tota Italia sardinae moventur.

Sectatores se nolle partes constituere affirmant, tamen factio Societas eos accusat quod in LibroVultuum consensum ad sinistram factionem ostenderint.

Scripsit Lydia Ariminensis