CONTENTIO ORIENTALIS

Pactum inter Iaponiam et Austrocoream ruptum est

Austrocorea constituit ne foedus renovaretur cum Iaponia anno MMXVI confectum de permutandis mutuis secretis rei publicae, quod nuntiavit Domus Caerulea, sedes praesidialis Austrocoreana, quia res iam ad utilitatem publicam non pertineret. Consilium captum esse mutatis condicionibus auxilii de securitate, ob imminutionem rerum quae a Iaponia exportarentur. Agitur videlicet de proelio oeconomico, cum nuper adiumenta Austrocoreae ablata sint ad merces electronicas novissimae technologiae emendas.

Minister Primarius Iaponicus Shinzo Abe hortatus est Austrocoream ut servaret fidem de mutuo auxilio inter munera secreta utriusque rei publicae ne quod incommodum etiam apud Civitates Americae Unitas acciperet.

Eventus in aliis contentionibus Extremi Orientis nuper exortis intexitur, attinentibus ad Boreocoream, quae duo missilia coniecit, Austrocoream quae ictus minaces explosit contra aëronavem Russicam, naves bellicae Sinenses quae insidiose ad navem petroleariam Vietnamitam appropinquaverunt.

Scripsit Lydia Ariminensis