CONVENTUS REM FEFELLIT

De sanctionibus consensus defuit

Conventus inter praesidem Donaldum Trump et dictatorem Boreocoreanum Kim Jong-un felicem exitum qui exspectabatur non habuit. Priore die Iovis in urbe Hanoi illi principes rerumpublicarum ex improviso colloquia intermiserunt quae priore die inceperant ; deinde abierunt, nullis verbis simul dictis: suam quisque sententiam comiter tulit gravi discrepantia simulate remota ne pactiones prorsus repudiarentur neve “oceanus inflammatus” evocaretur qui mense Augusto anni MMXVII praeses Trump minatus esset se effusurum in Boreocoream.

Quae dissensionis causa fuit? Praeses Trump explicavit colloquia interrupta esse de sanctionibus: ducem Kim promisisse se clausurum unum tantum ergasterium atomicum (Yongbyon) pro abrogatione aliquarum sanctionum ad oeconomiam pertinentium. Condiciones tamen Civitates Americae Unitas recusavisse , cum petissent ut aliae officinae atomicae clauderentur.

Cum duo summa munera inter se locuta sint periculum est ne res ultra procedat.

Scripsit Lydia Ariminensis