ASSAD ET KHAMENEI CONVENIUNT

De bello confecto locuti sunt

Primum accidit, ut bello Syriaco confecto Bashar al-Assad, praeses Syriae, Persiam viseret et summum clericum Ali Khamenei conveniret. Occasione data Assad Persis gratias egit, quod se in bello civili adiuvissent. Khamenei autem Syris “de bello territorum feliciter gesto” gratulatus praesidi Assad pollicitus est fore, ut auxilia sua continuarentur.

In eo bello Syri auxilio Iraniano carere non potuerunt. Israeles praesidia Persarum in Syria collocata incursionibus aereis identidem factis petiverunt, ut prohiberent, ne auctoritas Persiae in ea regione cresceret.

Postquam inter se convenerunt, Khamenei dixit Persas etiam in futuro regimini populoque Syriaco adfuturos esse. Cum Syros adiuvarent, se eos adiuvare, qui Civitatibus Unitis et Israeliae resisterent. Bellum, quod Syri adversus Americanos sociosque eorum inissent, feliciter ab iis esse peractum.

Assad respondit nullas in ea regione esse civitates nisi Persiam Syriamque, quae demonstrassent fortunam orbis terrarum non ab Americanis praestari.

Hassan Rouhani, collega eius Iranianus, ei promisit rem publicam Iranianam Syris in terra reaedificanda adfuturam esse.

Scripsit Volfgangus Austriacus