MONTES AUSTRIACI NIVIBUS SUBMERGUNTUR

Candida moles maxime crevit

Nonnullos iam dies corus ventus aerem humidum gelidumque ad Alpes Austriacas admovet. Ita fiebat, ut non solum copia nivium insolita accumularetur imprimis in iis regionibus, quae ad septemtrionem vergunt, sed etiam periculum nivium delabentium augeretur. Iam nunc montes Styriae superioris nivibus IV metrorum operiuntur. Proximis autem diebus, ni errant meteorologi, status caeli non mutabitur: nam usque ninget ita, ut altitudo nivis ad quinque metra crescere possit.

Tanta nivium moles tam brevi tempore in montibus nostris rarissime accumulari solet.

Quid mirum, quod complures vici nullum iam commercium cum finitimis habent, cum omni commeatu sint interclusi? In tanta tempestate ne desuper quidem eas res illuc mittere licet, quae ad vitam necessariae sunt. Ita vicani sibi ipsi consulere coguntur.

Tamen sunt, qui iussa magistratuum neglegentes aut viis periculosis utantur aut regiones abditas petant. Qui non modo se ipsos periculo obiciunt, sed etiam eos, qui illos nescio an ex tanta temeritate debeant servare.

Scripsit Volfgangus Austriacus