TRES TABULAE AFFIXAE

Three Billboards Outside Ebbing, Missouri 2017 USA UK

Regimen spectaculi: Martin McDonagh; scriptura scaenarum: Martin McDonagh; histriones maximi momenti: Frances McDormand, Woody Harrelson, Sam Rockwell, Peter Dinklage, John Hawkes, Abbie Cornish

Mater furens nomine Mildred nocte extra oppidum, in via prope solitaria tres ingentes tabulas adfigendas curat ut denuntiet inertiam publicae securitatis custodum qui, septem mensibus transactis, sontem filiae violatae mortem obeuntis non invenerint: “Stuprata moritura, nemone adhuc comprehensus? Quonam modo dux Willoughby?” Ira matris ius persequentis animos civium dividit; uni participes sunt cupiditatis ulciscendi, alteri probo duci publicae securitatis consentiunt, praesertim cum graviter aegrotus sit. Ille quoquo modo operam dederat ut reum inveniret, sed nihil effecerat. Alius partem magni momenti agens biocolyta Dixon apparet, cuius oblectatio est nigrocolores percutere. Mortuo Willoughby e corpore biocolytarum expulsus est a novo duce nigrocolore. Fortunate Dixon incendium effugit a Mildred ad sedem publicae securitatis admotum, dum libellum indagationum de puella occisa quaerit aufertque. Ille investigationes recipit, invenit alium quendam sicarium, cum interfectore puellae non congruentem, a quo cum Mildred repetere poenas vult. Sed epilogus mitis exstat, mutata ab iis sententia.

In hoc opere filmico Frances McDormand (Mildred) et Woody Harrelson (Dixon) eximia peritia histrionum praestant , sed etiam scriptura dialogorum excellit, exarata ab ipso dispositore scaenarum Martin McDonagh.

Vis rerum verba obscaena et fera comitatur, neque hoc parvi momenti est, quod modos tragicos comicis et absurdis variat: nonne est quaedam lectio Quinti Tarantino?

Scripsit Lydia Ariminensis