SINENSES CUSTODIAM UIGURUM DEFENDUNT

Sine causa ingens multitudo in regione Xinjiang in vincula coniecta est

Magnam Uigurum multitudinem in custodiam esse coniectam Sinenses nuper comprobaverunt. Dubium non esse, quin legibus severis pax et otium in ea regione praestarentur. Custodes vigilesque, qui ubique conspicerentur, necessarios esse ad pacem et prosperitatem restituendam. Ita prohiberi posse, ne ea regio (scil. Xinjiang) in statum Libyae vel Syriae descenderet.

Veneris die a Nationibus Unitis nuntiatum erat plus centies dena milia Uigurum a Sinensibus in custodia retineri. In ea regione annis superioribus seditionibus factis magna hominum multitudo periit. Cum Sinenses dictitarent causam esse apud seditiosos Mahumetanos, qui insidiis factis discordiam, quae esset inter Uigures et Sinenses, augerent, adversarii eorum Uigures opprimi affirmant.

"Iure Sinensi adhibito et auctoritate factionis Communisticae cladem esse aversam innumeris hominibus servatis" in actis diurnis legitur. Permultis terris eas ipsas res perniciei fuisse, quas civitates occidentales laudarent.

Scripsit Volfgangus Austriacus